subota, 23. studenoga 2013.

o kome ja to, a? (dil peti)


mislili ste da smo sve prošli,a? ma ke, e... najbolje tek dolazi. ;)
brzo će blagdani, a uza jubav, mir i dobrotu smisao blagdana je i spiza, pa ćemo sad malo o njoj. u svakoj normalnoj kući jema jedna prostorija ča jema puno duše i u sebi krije blago. u nju se naš dragi dalmatinac tipični u vrime o' božića pa sve do tri kralja uvučije s posebnin gušton. govorin normalnoj kući jerbo ove moderne kuće ča ih čine brez špajze nisu normalne, e...

evo, recite i sami kakva je to kuća u kojoj nima prostorije ča jema toliko duše, a? prostorije di naš lipi dalmatinac gre svako malo za vrime dana o'fešte jerbo tot jema puno važnega posla oko kušanja fritula, lupeštine suvica, oraji i bajami, lupeštine kiselih kukumari i čokanja pečenoga.znan, krede se i francuska iz frižidera, pa se poslin na brzinu žlicon poravnaje ono ča je u terini ostalo da se ne sinja, e... ma lupeština iz špajze je ipak mrvu drukčija jerbo se ona događa ritualno, e... za nju se rade cile pripreme koje se sastoje od muvanja od kužine do tinela, obično uz zvižđanje oli pivuckanje kakve pismice, ulaženja u gujicu oliti ulizivanja svon ženskon rodu ča je u kući i držanja dugih govora punih lipihn riči a sve zaradi stvaranja neoborivog alibija; oni momenat kad ženski rod u kući učini kolafintu da se ništa ne sinjaje gre se u pljačku, e... ta je radnja, narafski, vrlo opasna, jerbo ako krivac bude uvaćen na dilu, neće bit dobro. bar on tako misli, e...
zaradit tega je i činija alibi, ono, neka se njega dobro čuje i vidi na potezu tinel-kužina. opče nima pojma da se sve vidi samo se čini finta da se ništa ne vidi jerbo gušt je priko joka gledat šjor lupeža kako gušta u carinjenju špajze, e...

narafski, nije spiza u terinama ča bude na škancijama svo blago špajze. u špajzu se stiva i koja vrića kumplira, manistra, brašno, kvasina, cukar, koja demejana vina. tot obično bude sve potribno i nepotribno, ono ča se mora čuvat ka joči u glavi i ono ča više nikome ne triba, ali je grijota bacit u škovace.

morete tot nač kakvu staru boršu s kojon se gre u ribe u koju bude tunja, koji batipan, koju metlu i škovaceru, kašeta i škatula, starih foja, koji sič piture, prazan oli pun, koji važ od svega i svačega, piture, kole (lipila), biži, pomidori. 

po škatulama se uvik nađe i karte-devere, koja kacavida, špatula, pinel, bit će tu i koja stara lumbrela, koja krpa, štraca itd.

jesmo sve rekli, a? ma vraga, bude tot svega i svačega, zaradi tega ta prostorija i jema toliku vridnost, toliko duše. zaradi tega i tvrdin da kuća koja je nima nije normalna.

slide dani vižitavanja i carinjenja špajze. bit će poslin i koji kil viška, ali jema đimnastika, merjan, bičikleta. a sad guštajte dok morete, niko vas neće sinjat ča činite, ma ke, e...

notano u prvi misec 2006. by xvii, blago modificirano danas.


Nema komentara:

Šufit