e...
evala svitu moj!
kako san van nikidan svečano obećala, notavat ćemo po spli'ski, jušto onako kako je govorija moj pokojni dida. da ne nestane ova naša rič, besida ča je srcu i joku draga. i uvu, narafski.
sve ča se ovod notaje, bilo na standardnon rvackon, bilo po spli'ski je napisano prema istiniton događaju.
i tako će bit i sa današnjih nikoliko riga teksta.
ja jutros u jednu poznatu splis'ku butigu kad na kasi azijat. moga je bit i naš čovik, ali naši su se umisilili da su nešto nadnaravno, pa neće da rade, odnosno tili bi, ali bi tili s pučkon skulon bit likar u bolnici, profešur, sudac, inđinjer.
azijat na kasi je naučija nikoliko naših riči, ali još nije tutokompleto spreman na spli'sko lajanje i stanje uma.
na kasi stariji barba plaća.
ja iza njega, nigdi mi nije priša.
iza mene svita, cila fila, ali sve je u redu, niko ništa ne grinta.
i sad barba vadi svoju spizu.
azijat mu upire prston na 2 (ričima: dvi) kobasice koje je vazeja, a očito nije ni gleda pošto su.
te 2 (ričima: dvi) kobasice su priko 4 eura.
azijat mu malo na našen, malo na ingleškon, malo na mote ukazuje na to.
i mislin da je čovik pošten, upozorija je kako je zna i umija tega starijeg barbu na tu nenormalnu cinu za 2 (ričima: dvi) kobasice.
barbi ništa nije kjaro.
ne razumi opče ča mu azijat oče reč.
rečen mu:
- barba, govori van da je to skupo. morete vazest cili paket drugih kobasica za te pare.
- skupo, a? oli je to skupo? - reče on meni
- a je barba, skupo je, možete ih vratit, pa vazmite druge, povoljnije. ako van to nije skupo, a onda ste puni pinezi...
e, sad počinje spli'sko stanje uma. cila fila je čula o čemu se radi. pola file mu viče skupo je, a pola ne kaže da nije skupo, ali oče da se ča prije obavi na toj kasi.
čuju se razne riči.
svako jema nešto reč.
- kad ona mene pošalje u spizu, a ja ne znan, oli ja gledan!? - kaže barba
narafski, kriva je ona. za sve. a ko će drugi bit, a?
je li barba na kraju vratija te kobasice?
evo, otkrit ću van:
NIJE!
platija je da se svit u fili ne buni.
bilo mi ga je žaj.
ostarija je, a još je zabrinut oko tega ča će ko reč... a baš to ča će ko reč je upropastilo toliko života, sudbina, fameja.
friga mi se šta će ko reč. ne zanima me višje njanci vlastito mišljenje, a kamoli tuđe.
nadan se bar, da će mu ona, učinit jedan dobar paštafažol ili barenko polubiž s kobasicama da ne bude tutokompleto zafrkan za danas. azijat ga je lipo upozorija, ali se uvatija na baketinu tuđega mišljenja.
2 kobasice by AI
