ponedjeljak, 17. lipnja 2013.

*******

e... kad je padala kiša, ronjali smo na nju. evo sunca, pučanstvo jopet ronje. čovikovo srce nikad zadovoljno nije. počele su lupeštine po plažama, pa će vam policijoti reč da ne ostavljate takujin na šugamanu oli ispod šugamana, a isto vridi i za bračolete, rečine, kadene. kraće rečeno: čuvaj svoje stvari, pa će ih i policijoti čuvat. ministarstvo zdravja će van reč da ne grete po najvećen zvizdanu brez butelje vode i španćjere i da se držite bande o' lada. kraće rečeno: čuvaj se, pa će ti i bit dobro. hitnu nemojte zvat ako se ubodete na ježinca jerbo vas to može doč nekoliko iljada kuna. rađe bokun bumbaka i piš-piš po njemu, pa na ubod, izač će virovali oli ne. i proč ćete mukte. narafski, izist štagod lagano, zaboravit na paštafažol i paštašutu do idućih kiša i ne činit salto-mortale na kavale. oli na ježinca. e bravo, da van rečen, i oni iphone od 7 iljada kuna ostavite doma jerbo na vrućinu će mu bit vruće, a grijota bi bilo da se 7 iljada kuna raskrabi na suncu. nije to malo pinezi, za njih se moglo poč na poduke nikoliko godin, ali vridila je ona šta će znanje, uče mačani, pametni lipe pršut priko čela. do ulaska u EU još 13 dana. i kiša će i jopet padat i sunce će i jopet sijat. bit će i ledeno i vruće. lupeži će i dalje bit, a incukanoga svita isto.

Nema komentara:

Šufit