mali pozapodnevni litnji mix

mali pozapodnevni litnji mix by xvii

prva liga, a? a još da znate da san vidila i dupina, sigurno bi ostali deštuko, e... dva puta je skaka iz mora, prizor za pamćenje.

a di je xvii i šta čini, a?

e...

za sve one ča su me ovih dan pitali di san i kako san, evo odgovora u slici i riči.

u splitu san, urlap je finija, eto i jedan litrat iz ureda koji je preživija veliko pospremanje. narafski da se kupan u moru svaki dan i narafski da ću barenko još nikoliko miseci tako. službeni urlap je finija, ali morski gušti nisu, pa će se tako do kraja lita, koje meni obično dura do jedanaestoga miseca, još kupat, plivat, sunčat, poč na koji izlet. je, ši, dobro ste sinjali, laptop san spojila u svoj stari kantun da mi je više mista, u njega upravo utirajen cd od lukya, malo ćemo radit, pozapodne valjda kupanje i eto, to je to, mislin da je kurjožima sad duša na mistu - slije morete uvećat klikom :)

matejuška

matejuška by xvii -

slikano jučer, mobitelom,

uvećajte klikom, isplati se :)

sićanja

kiša.

dugo smo je čekali.

budi sićanja.

prolazi mi kroza glavu

moj život,

judi,

beštije,

događaji,

pobjede,

porazi,

uspomene...

pari mi se

ka da se sićan

i onih vrimena

kojih višje nima

kojih su se sićali

oni kojih

isto višje nima.

prominija se grad i čovik,

tovara višje nima ni za lik.

samo se furešti

jutros najranije

guraju u portu,

čine konfužjun,

potižu kufere.

za njih je

sve samo prolazno.

cili život ka litnji pljusak.

*****

kartolinu starega splita san

pristojno posudila

s ovogodišnjeg plakata za splitsko ljeto.

da nije našla kojega jubavnika, a?

e...

jeman jednega susida tot u kvartu ča jema smišnoga biloga pasića. nekako mi pari da čovik voli tega pasića i da mu je puno drag. jema u susida i žena, danas san je mrvu bolje pogledala. pari mi zločesta vištica.

e sad, je li samo zločesta ili  je i nešto drugo muči, ne znan, ali vidin da redovito pusti tega pasića pod tonobile i da joj se friga oče li završit o' ispod kojega točka oli ne, e...

ja kad vozin ferman, čak joj i rečen da makne pasića, da ga pripazi i tako to, ma neće tako svak, e...

jutros i jopet ista pisma, uključin motor, da ću krenit, kad ona i jopet pušti tega pasića. narafski da ga nisan satrala jerbo znan vozit tonobil, a i bilo bi mi ga žaj, ali umisto da mi zafali ča pazin još mi je danas ta nesrića o'  žene i svašta izgovorila a samo zaradi tega jerbo san joj rekla da pazi pasića.

pitan se voli li uopće tu beštijicu, znači li joj išta muž kojemu taj pas znači i da se možda nije odlučila rišit i pasića i muža, e...

da nije našla kojega jubavnika, a?

neš smršavit ne, ne da konzum, e...

e... nikidan je bilo otvaranje velike konzumove butige na sirobuji. moj tekst su narafski pročitali i ljudi ča rade u konzuma i onda mi je jučer zazvonija mobitel.

lipo su me obavijestili da su im se moj tekst i slike puno svidili i da su me odlučili nagradit poklon - paketom.

super, oduševljena san, ko ne bi volija dobit poklon paket, a?

danas san tribala po njega doč, a dok san došla, postala san tutokompleto kurjoža. ma šta ću dobit, šta li su to spakovali za me, šta me čeka?

e... znan, sad ste i vi kurjoži, e...

sidnen ja u tonobil i idemo, ovi put put stinica jerbo san se tu dogovorila predignit paket, a u paketu je bilo puno lipih stvari koje se smi pokazat, e... evo ih gori na sliku, e...

i tako neš smršavit ne, ne da konzum, e... jerbo ako neš poza kupnje digitalne balance u konzuma kupovat goluzarije u konzuma a i drugdi , konzum će ti ih darovat.

narafski bog ipak dade priliku za smršavit onomu ča oče smršavit, pa san od puste sriće ča san dobila lipi poklon paket uspila zaboravit osobnu uz koju mi stoji vozačka i prometna u konzuma.

narafski da čin san zaparkirala tonobil jopet zove konzum i kaže ma dokumenti, čekamo vas, dođite.

e, sad me tokalo jopet na stinice, ali pješke jerbo ko je vidija svjesno vozit brez vozačke, a? kakve san sriće, odma bi me fermali policijoti (a nisu otkad vozin) i oli bi mi virovali ča se meni sve dogodilo oko paketa, uzbuđenja, sriće i tako to.

zato lipo na noge, pa ča se izgubilo od kili sad se goluzarijama jopet namiruje.

ekola, finito, gren ča, jemate pozdrav! ovo je bilo super iznenađenje. fala lipa konzumu na nagradi, ali i na poštenju apropo mojih dokumenata.

sinatra by massimo na spli'skoj rivi

kad Umjetnik ka ča je Massimo dođe u split, to se nikako ne propušta.

evo kako je bilo...

slike se mogu uvećati klikom

evo i video materijal, pogledajte sve, stvarno je bilo odlično...

digitalna balanca

e... judsko srce nikad zadovoljno nije. uvik nešto išče, uvik bi nešto prominilo.

digitalnu san balancu tako dugo gledala i mirila po butigama o' teknike, ali i drugin velikin butigama. baš san je tila jemat, a uvik je pizala prikovišje vengo ča san ja tila za to iz takujina izbrojit, ali i jopet bi ja uvik rekla ma bit će to jedan dan negdi cinije, pa ću ja to i ipak vazest.

da se razumimo, jeman ja i analognu balancu, mirila mi je kile sasvin dobro.

narafski, sad kad jeman digitalnu, opče nisan sritna ka ča bit tribala bit jerbo san je konačno vazela. zapravo sad tek vidin koliko san bila sritna peršona dok san jemala samo analognu.

a ča je reč, a?

digitalna balanca je sam vrag sakriven u tekniku, e...

virujte mi svitu moj to je gore o' onega fejsbuka i ostalih stvari na netu na koje se čovik navuče, e...

ja na balancu stanen svako jutro i znan koliko kili jeman za ti dan. tako cili život. ujutro je najbolje. prije doručka i poza konduta. uvik na isto misto.

e ma sad mi ova nova uza kile miri i deke, a deki se kroza dan i noć minjaju.

gospe moja, sad san toliko kurjoža ča je s tin dekima i tako onda stani ujutro, stani pozapodne, stani prije vengo gren leč i narafski tija ne tija stalno misliš jesi li dobija oli izgubija dek dva.

satrat će me, sad više ne smin ni mislit, a kamoli se mašit na sve one lipe i šesne bokune koje volin, na sve goluzarije ča život znače.

izist nešto smiš samo kad si gladan (da ne krepaš o' gladi narafski), deki se odma vide.

more bit da bi konzum bolje na meni zaradija da nije puka skonto na te digitalne balance. ovako ću vazest samo osnovne životne namirnice, nima višje čikolati, napolitanki, pašti, a pogotovo ne krokanti. u kirigina i cukarina ću isto sve slabije poč (u svaguše ne gren nikako, bože sačuvaj), a mislin da će bez kojega moga šolda ostat i oni popaj na zvončacu jerbo pizeta in je odlična, teško joj je odolit, ali ovo čudo od balance te s onin vražjin dekima gleda krivo, ka da ti priti, ka da će se dogodit velika katastrofa, ka da ćeš doč toliki da će se o' tebe zemlja profundat, ka da ćeš ako uđeš u more izazvat takvu plimu koja će potopit svit i tako ne, nima više goluzarija, e...

barenko dok se ne naviknen na te deke i uveden i jopet samo vaganje ujutro, e...

cvrčak

cvrčak by xvii - snimljeno jutros - mobitelom

pogled put čiova

pogled put čiova by xvii - uvećajte klikom, isplati se

e... ovo je pogled sa spliske strane, a dok dura ova vrućina i ovoliki konfužjun, narafski da ne mrdan o' ove bande di jesan ni put trogira ni put omiša ni put otoka. nigdi, stoj tot di jesi, čekaj da fini vrućina i konfužjun i onda misli kako negdi poč, e...

konzum - velika butiga na sirobuji

e... konzum, velika butiga na sirobuji. otišla san jutros vidit di je to, ča jema, sinjat ako je nešto povoljno i tako to. nisan vozila, vengo smo se uputili kombijen ča svakih po ure gre sa tantobusne stanice na sukoišanskoj (odatle gre i tantobus za kaštila) i narednih deset dana će vozit mukte svit tamo.

fala bogu da nisan vozila jerbo je konfužjun bija poveći. narod je očekiva narodno veselje apropo otvaranja, pa je pohrlija po najvećen zvizdanu tot. narafski da je nekima došlo i zlo, kad san išla ča zvižđala je hitna put tamo. ka i na svakome narodnome veselju, dilili su neko pečeno meso mukte, ali ka i na svakom narodnom veselju od ratobornih i bisnih baba nisi moga tot ni pristupit, a da van prav rečen na ovu vrućinu mi se ni ne da izist tako nešto, bolja mi je bila pohana kokoš doma. danas su pak pečene piliće u novootvorenom konzumu prodavali dosta povoljno, manje od 10,00 kn, ono , 9,90 ili 9,99 tako nešto. svaki stoti kupac je dobiva sve mukte, dilili su i neke dariće, rukovala san se nepoznaton peršonon obučenon u medvida i tako to.

butiga je stvarno ogromnaaaaaaaaaaa. morete tot nač sve od spize, ali i robu i tekniku. prodaju se čak i klima uređaji, zamrzivači, televizori itd. nač ćete i štagod za kompjuter, ali i kompjuter. trenutno jeman svu tekniku ča mi triba, jedan televizor doduše tražin, ali mi ga je nekako pametnije vazest u koju butigu o' teknike, pa san u tu veliku butigu šjor todorića zasad vazela samo jednu digitalnu balancu - one su bile povoljne, oko 60,00 kn i još autića (igrački narafski, od pravih tonobili mi je prikovišje i oni moj twingić, jedva i za njega nađen misto).

e kako san potrošila 100 kn bilo mi je dosta za dobit biljetine za nagradnu igru, neku zvir od tonobila se more dobit ako se kupi stvari za 50 kn i ubaci kupon. narafski da san i to napravila jerbo nikad ne znaš di te srića oče, pa eto, ako me daruju tim tonobilon, ipak se neću bunit.

poč ću ja jopet tamo za koji dan kad mrvu fini ljudski stampedo, pa ću napunit portapak spize. vidila san jeftinoga mlika i lipih keksi, mesa, fruti (voća), verdure (povrća), ali fala bogu da to sad nisan vazimala jerbo bi bila komedija tutokompleto za vratit se. raskrabili bi mi se i keksi i čikolata. nisan išla tonobilon i bogu fala da nisan jerbo mista nije bilo njanci za šuferin. za vraćanje su isto obećali kombić, ali svita krcato, ko zna kad će doč i onda smo laganini do lovrinca.

nabila san kapu na glavu koju san dobila na dar jerbo san u butigu od robe mana koja je isto tot vazela gače za samo 50,00 kn (a šta mi dobro stoje, zbog tega se isplatilo poč) i idemooo, autotabanići, ko će se gurat s babama, e...

bože moj, kad smo već tot, povirili smo i do groblja, stavili dva cvita i idemo na tantobus. trču ljudi i tu s konzumovim kesama, pola ih fotano, stariji, bune se, beštimaju todorića... e, todoriću, butiga je za peticu, ali s obziron kakav je naš narod triba si kombić stavit barenko svakih deset minuti, a ne svakih po ure, a i malo višje spize pripremit za pučanstvo jerbo mi je bila muka vidit kako se svit tiska za to malo obida. narafski da san tot vidila i jednega moga susida ča se more vidit svugdi di se nešto dili i narafski da je taj ka i uvik iskamčija da mu nešto udile. odija je taj i po repete, e. fala bogu da nije kupija ništa.

a radnici? kako san vidila neke žene koje su radile i u konzuma na stinicama, a ja u konzuma dosta kupin (tot i u plodine, a u keruma ne gren jerbo stalno pljuca po obrazovanim ljudima i onda mu ja moje intelektualnim radom zarađene kune ne dan), pa san malo š njima i proćakulala, kažu radi se i to je važno, bolje da posla jema, vengo da ga nima.

e, vidila san i škanciju s librima, drugi put ću se sigurno na njoj više zadržat, danas san od konfužjuna jedva kupila ovo ča san rekla i jedan lak za nokte i to je to. kažu da će večeras bit i rokete.

a za koga su autići, a? kurjoži, a? ma za koga će bit, vengo za moga nećaka, e... :)

kako ćete iz splita doč a da na idete kombićem? ka da grete za omiš, na trokutu pazite i izađite iz splita. onda pičite dalje put omiša, ali se negdi kod fiata prestrojite u desnu traku. još malo ravno i ne morete falit, ogroman konzum vam je malo iza ogromnih plodina. kad se vraćate i opet ajdete put omiša (da, da, nisan falila), pa ćete se okrenit (narafski ne u omišu, vengo bliže), uvatit smjer za split i kad budete ulazili u grad jopet pazite na pristrojavanje da ne završite u solinu. ma i ako se to dogodi nije greda, jemate i tamo ogromnih butiga, a možete se i jednostavno okrenit u jopet put splita. ;)

e, bravo, ovi litrat di pivaju, mutan mi je ispa, nekako mi pari da je na njemu i boro pompjer, ma nisan 100% sigurna. e, pa boro, skužaj me ako si ti bija tu, bila bi ti se svakako javila, da san bolje gledala...

dnevno-noćne kontre

e...

kad je nikidan šjora kosorica bila u split, di god si se okrenija oli gleda moga si trefit policijote. jučer je bija u splitu predsjednik josipović i ja ne znan je li policijotima bilo vruće, ali onuda kud san ja išla oli vozila nisan trefila njanci jednoga jedinoga policijota.

vruće mi je, vrtin se po postelji, ne moren zaspat, pa slušan zvukove ulice. svašta možeš čut. tutnje, uglavnom nezakonito stečene, konjske snage, karaju (ovo oče reč svađaju) se parovi, a tribali bi se volit, čeprkaju nevoljnici po kantama od škovaca...

tiči prid zoru pivaju. još jedan dan stiže.

more moje...

more moje by xvii

očale na oči, noge u more...

očale na oči, noge u more... by xvii

jedna od najlipših ljubavnih pisama...

Miriše sol u tvojoj kosi
Sjećaš me na bol i vjetar me nosi
Prema tebi kao brod na grebenje
Razbit će me opet staro nevrijeme..

Ali svejedno je kad znam da tebi pripadam..

Svi putevi isto nas vode
Bez mene nema ni za te slobode
A mislila si da te neće boljeti
Ako odeš prestat ćeš me voljeti..

Ali uzalud je sve, još uvijek voliš me..

Dotakni me usnama
Još voli me pjesmama
Dotakni me prstima
I skini bore s naših godina...

nima straja isprid policije u splitu

nima straja isprid policije u splitu by xvii

- klik za veće -

slikano mobitelom, jutros, isprid druge policijske u splitu

morski gušti

 

 

 

morski gušti by xvii, klik za veće, slikano mobitelom

 

pogled u daljinu

pogled u daljinu by xvii

klik za veće - slikano danas mobitelom

more

more by xvii - slikano mobitelom, danas, prije nevere, klik za veće

*****

e... poza devet dan brez mora (rad, upaljena ušesa, nekoliko kila problema iz letrike koje je tribalo riješit itd.) rekla san ma boli me višje uvo za uvo, ne moren više izdurat, gren na more. bilo je odlično, a kad je počelo o' kaštila grmit i sivat vratila san se. fala ča pitate, pijen antibiotike, sad novu vrst, stavljan kapi, to mi je isto dalo novu vrst i ušesa su bolje...

split

split by xvii - klik za veće, slikano mobitelom

friško, o' jutros, e...

splite grade stidi se i srami se....

e... u ovoj zemlji su oni ča ne plaćaju poreze i doprinose posebno cijenjena vrsta, država ih štuje i poštuje, predstavljaju nacionalnu vridnost br. 1 i ko ih smi taknit, a? formalno budu blokirani, a realno jemaju i drugu tvrtku na koju dobivaju uplate, a na blokiranu naručuju poslove i robu koju nikad platit neće.

postoji i niža vrsta, obično su to urbani i obrazovani ljudi koji ne viču da će se nekome krvi napit i ne šetaju sa čakijama i sl. oružjem, vengo tiho i mirno rade i plaćaju sve svoje obveze. e od takvih uzmi, zgrabi, otmi, od njih se namiri i za one ča ne plaćaju jerbo da je pravde tako pristojni i kulturni i šta je još sramotnije obrazovani (a ko je vidija to bit, a?) ne bi tribali ni postojat.

23.12.2009. stiglo je porezno rješenje od grada splita, porez na tvrtku, moju, djelatnost inđinjerstvo, poduke i prijevodi, 1 stalno zaposleni i nekoliko honorarno, katkad neko na određeno, promet nikad nije preša 100 000 kn, u iznosu od 2000 kn. to je ka bilo za 2009. i platili smo iako opče ne razumin zaradi čega nam taj porez vazimlju, a još mi je manje jasno zaradi čega ga i velike firme plaćaju isto toliko.

danas, još nije zadnji dan 6. miseca 2010. pitaju jopet 2000 kn. to je ka za 2010. platit ću iako opče na razumin za šta je to i zašto mi pitaju tako puno.

neki su mi rekli da je to ka za reklamu. e pa grade splite ako je tako, kako te nije sramota da ti recimo ilegalne poduke i prijevodi budu oglašeni na svakom kantunu, semaforu, portunu, a? je li vam ta kumpanja bela ča radi na crno dala bar 1 kunu za porez ili je pak utirala kune uškuro nekome u komunalnom redarstvu i državnom inspektoratu, pa ovi čine fintu da ne vide te ilegalne oglase, a? ne možete se pravit blesavi da ne znate za ilegalne oglase, osobno sam ih prijavila poreznoj upravi split, a oni su to proslijedili komunalnom redarstvu i državnom inspektoratu, a ovi pak nisu napravili ništa - ti oglasi su samo još veći i još ih je višje još malo i bit će ka jumbo plakati. neka se stidi i srami i grad split i republika hrvatska koliko potiče rad na crno i koliko maltretira čovika koji legalno i pošteno radi (od prevelikih nameta do podmitljive i krajnje nenormalne birokracije). svakim danom mi je sve višje i višje žaj ča davno nisan vazela pasoš i rekla pa-pa ovoj nazovi zemlji. ma šta se ičemu čudin, a? kakav poteštat takav i grad.

---------------------------------------

sramota od grada
From:
nada@parametar.hr
28-06-2010 15:18
To:
zeljko.kerum@split.hr, andjelka.viskovic@split.hr, jure.sundov@split.hr
http://www.xvii-online.org/2010/06/splite-grade-stidi-se-i-srami-se.html
(da, ovo je moj clanak...)

Ne pitam ništa, samo konstatiram da porez i sva ostala davanja placam, a da je cili grad šporak, neuredan, pun oglasa za rad na crno na svakom kantunu.
Gore od najgoreg sela. Sramota!
Sadasnja gradska uprava sigurno nece dobiti moj glas na iducim izborima.

mr.sc. Nada Magazin, dipl.ing.

ajde ča - gotova je radna šetimana, sutra počinje nova

e...

ajde ča...

evo gren, finila san posal za danas (narafski, jopet je bila letrika), utrnit ću laptop i ekola, finito, nastavljamo sutra - eto toliko o spajanju dana, produženom vikendu i sl., ja san sve ove dane radila, baš svaki dan... iako san potpisala peticiju ča su je organizirali sindikati jerbo mislin da jemaju prav, ja se eto za se ne bunin ča niman kolektivni ugovor, ča me toka radit uvik (i zimi i liti i kroza radni dil šetimane i priko vikenda i praznikon i svecon) i ča božićnicu sebi dan samo ako jema koja kinta višje na žiro računu, a tu kintu viška mi narafski neće dat niko ako se ne zaradi... radnici su u mene uvik dobili plaću oli honorar prije mene, ja uvik iden zadnja kad su isplate, a od divljih klijenata ka i od divljih radnika me niko ne štiti, virovali oli ne jema i takvih. je, je, jema onih ča ne bi platili račun, jema onih ča probaju bit nasilni, jema onih ča oče nevjerojatne rokove, a prišu ne bi platili itd., a ne jedan put san od nezaposlenih na razgovorima doživila da neće razgovarati ako plaća nije bar 20 000 kn (ričima: dvadeset iljada kuna - dobro ste pročitali). doživila san i teške neradnike, prokleto line ljude, brezobrazne, nekulturne itd. doživila san svašta, a apropo svega tega od nikoga ka pomoć niman ništa. fala bogu jeman i vridnih i dobrih ljudi i takvi će kod mene moč ostat do penžjuna. nikad nikoga nisan stavila na minimalac i uvik mi je žaj ča ne mogu ljude platit i višje vengo ča dobiju jerbo znan da su oni vridni vridno i odradili. ne bi višje razglabala, ukratko jesan za prava radnika, ali tila bi i da oni koji vridno ne rade svate da su prava zaslužili vridni i savjesni, a ne oni koji su porazbijali sve u firmi, pokrali blagajnu oli stvari, udrili kolegu oli šefa šakon, bezrazložno i brez javljanja ne došli na posal misecima i sl. jerbo, virovali oli ne, jema svega.

gren ča. ... finito posal za danas, nastavljamo sutra...

radni vikend

petrovo uvo - slika je s neta

e... jesan ja ono nikidan rekla da bi tribalo malo odmorit, a? malo, e, jerbo da ne moren puno mirovat, e... danas san cili dan u letrici, more bit da me ona najbolje odmara, hehe.

najprvo osnovno, a to su narafski osnove elektrotehnike - trofazni sustav, simetrija, nesimetrija. šta je tribalo sredit za danas, sređeno je.

ajmo ča dalje, nešto složenije, sinhroni strojevi - turbogenerator, vektorski dijagram (točnije rečeno fazorski dijagram), kut opterećenja, promjena uzbude itd.

narafski, sredili smo i to i evo već od 6 uri pozapodne otkad san se rišila tega generatora pa sve do sad čitan jedno skroz zanimljivo štivo puno shema, formula i slika na temu distribucija električne energije oli distributivne mreže jerbo mi to triba da sredin i riješin još neke stvari.

uho me narafski još uvik smeta i boli, a uri je skoro devet i po. oču, poč ću jopet kod likara, ali to će bit u ponediljak. radin ja i sutra, ne dan se, neš ti tega uva, a radit ću i u ponediljak. a sad, a? sad ću ipak konačno poč ča iz ureda jerbo je, letriko moja, zaradi tebe san ostavila mladost u formulama, ali nadan se da neću morat i goli život dat. kad boli uho, triba ipak znat fermat...

inače, padaju mi sad na pamet raznorazni ušonje. jema baš šesnih ka ča je recimo slon, tovar, zec, kunac, koker-španijel... asti sto koje smišne beštije, nadan se da ih bidne ne čapa ka i mene, e...

vengo, znan da ste kurjoži, e, a u kakvoj su vezi tekst i slika, a? a more bit da i jesu u nekoj, e... evo, špijat ću van. na sliku je uvo ča se zove petrovo, stavila san ga tot da mi malo zavonje na more, barenko u mislima. jerbo, čin zavonje na more, život odma krene mrvu bolje. ekola, gren ča, jemate pozdrav!

mojoj zemlji hrvatskoj

e... kažu kad nešto žarko očeš i želiš, to se pri oli poslin mora ostvariti. narafski, ako je u granicama mogućeg, e... zaradi tega svin srcen želin:

1) želin da se višje u lipoj našoj ne moran sramit zaradi tega ča mi osobna, vozačka, diplome oli jednon riči dokumenti nisu falšete.

2) želin da se višje u lipoj našoj ne moran sramit ča nisan lupež, vengo živin od rada.

3) želin da višje u lipoj našoj mito ne bude nacionalna vridnost.

ako mi se želje ostvare, lipa naša će svakako bit bolja. ovako domovinu jeman, tek u srcu je nosin i tužna san šta je tako. volila bi da hrvatska bude jedna normalna, civilizirana, kulturna, ljupka zemlja u koju će bit poželjno doč, a ne da ljudi gledaju iz nje uteč. volila bi da poštenje, rad, obrazovanje i pristojnost budu nešto vridno, a ne da se takvome čoviku rugaju i šprdaju š njin, a mafiju se veliča. volila bi... e... bit će valjda nešto od mojih želja, nadan se. nešto se ipak prominilo na bolje i to mi i daje razlog za nadu. šta, a? e... fala bogu, ove godine bar jemamo pristojnoga, pametnoga, obrazovanoga i tog mista dostojnoga čovika za predsjednika. znan, jedan čovik ne može sve sam, ali duboko virujen da nije on jedina svitla točka ove zemlje. jema još malih, skromnih, anonimnih ljudi koji ne mite, koji nisu falšetali dokumente, koji pošteno rade i koji jemaju iste želje ka i ja. zapravo oni nisu mali. takvi su veliki, e... i upravo takvi su snaga koja će zlu koje upropaštava ovu zemlju reč dosta. znan da će tako bit. sritan vam dan državnosti.

*****

e... svi ćemo poč pri oli poslin, ali danas mi je bilo posebno žaj kad san na ti internet u slobodnu vidila jednu šonetu. partila je profešurica Jadranka Vuletin, predavala mi je fiziku 3 na fesbu. bila je krasna u pravom smislu te riči. najprvo Čovik, Čovik s velikom Č, vrstan pedagog, odličan profesor, autor skripti, žena koja je općenito puno dala znanju i znanosti. šteta ča je morala poč, pamtit ću je ka jednu od najboljih peršoni koju sam upoznala tokom cilog mog školovanja. fala joj.

agava

agava by xvii - klik za veće

u zadnje vrime

• čitan : cecelia ahern - da me barem možeš vidjeti - došla san do pola, meni se sviđa, žena dobro piše...
• slušan: u zadnje vrime najviše radijo i to u tonobilu, u uredu radin, pa u zadnje vrime tot sve gasin, a s mobitela višje ne slušan ništa na sluše (čuvan uši hehe), vengo samo naglas i to su obično vijesti od kojih mi je obično zlo, ali eto moran znat šta se događa. radijo koji se čuje u splitu, a koji mi je u điru zadnje vrime zove se radio riva 93,6 MHz- tu se nađe dobre mužike.
• jeden: sve šta volin, danas je bila manistra polivena šugon od gljiva.
• pijen: ka i uvik vodu, ledeni čaj i sokove, eventualno kavu.
• kupan se: o kadi nećemo pričat, a u moru kako stignen i di stignen, skoro svaki dan, kašuni, kaštelet, merjan...
• radin: sve šta moran a to je svašta iz moje struke, u zadnje vrime najviše matematika, fizika, elektrotehnika - osnove elektrotehnike, elektrotehnika - sinhroni strojevi, elektrotehnika - tehnika visokog napona, laplaceove transformacije i još puno tega ka i poslove vezane za upravljanje poduzećem.
• život sladin: u zadnje vrime đelaton od vanilije i čikolate
• čekan: lipo vrime, koji slobodan dan, malo bolje i čovječnije čovječanstvo, ali i pojednice itd.
• na tv gledan: krimi serije, trilere i slične stvari - gledaš i ne moš virovat da je čovik sve to i zapravo kapac učinit, ne moš virovat, ali isto se nađe onih koji učine, e...
  
• fuzbal, mundijal: hehe, gledat ću finale, to će ionako bit najzanimljivije :)
  

šta ćemo još reč, a? ništa, ovo je dosta.

jedan sportski u jednoj crti

prvi dan lita

prvi dan lita by xvii - klik za veće

narafski da je poza kiše more najlipše i narafski da san se i danas kupala :)

do 12 u 12 riga

1. kiša, potres, pljusak
2. ustajanje, oblačenje, doručak
3. umivanje i pranje zubi
4. posal bar malo, ne mogu dugo mirovat, šta ću
5. internet bankarstvo, plaćanje računa, vađenje izvoda
6. čitanje mailova, mail računovođi, mail djelatnicima
7. tel. ne zvoni jer fala bogu radni je dan, a sutra neradni, pa je i ovi danas posta neradni i tako iman mira, baš lipo... /e rvati ča volite radit, poslin kukate mižeriju i svak je kriv/
8. moran nešto riješit iz sinhronih strojeva
9. gledan, mislin, minut dva, yes, sinilo mi je, to najviše volin
10. pišen... pišen... pišen...
11. desetak stranica, ajde ako se malo stisne, može se proč i sa dvi tri manje.
12. gotovo, finito, sve sam izračunala, gren na obid, popodne ću jopet na odmor, ali narafski neće to dugo trajat

jo koje malešne uši...

e... uslikala san ga danas i sad je narafski ključno pitanje zna li neko je li ovo kunić oli zeko, a?

ma zna li neko jesan li kunić ili zeko? - by xvii - klik za veće

vižitajte: http://www.tarraland.com/razlika-kunic-zec.html ,

narafski, ključ odgovora na ključno pitanje je fala bogu u ušima... :)))

jo koje malešne uši... ma neka ih, da su veće bija bi neko drugi...

odmori se, zaslužija si :)

e... počelo je vrime urlapa oli godišnjih. kad ja gren, a? u službenu evidenciju uvik napišen da je cili sedmi godišnji, ali kako svitu uvik nešto triba od onega ča mi radimo, onda se to od sedmoga zapravo pritoči u nikoliko slobodnih dana od šestoga, nikoliko od sedmoga, nikoliko od osmoga i koji od devetoga. nije baš ni da bude jušto misec dan, ali eto nešto moran napisat u tablicu, e... dakleM, ka i godine svake ne gren na havaje ni na put oko svita, a ni na put u svemir. tot san, ako šta triba, telefon i mobitel su istaknuti tu. jedino, ako se odma ne javin, onda more bit da plivan, pa probajte za deset minuti oli pošaljite sms. ja ne mogu cili misec dan ne radit ništa, šta ću, nisan taj tip, ali zato s kupanjen počnen rano i završin kasno. nađen svaki oli svaki drugi, treći dan malo vrimena za to i za još di koji izlet, a po otelima od pet zvizdica neka idu političari, jerbo, ako im je zadatak da nas nerviraju, onda su i prepošteno za njih zaradili, e... ovo ću lito ka i svako plivat i sunčat se (već san ja ka skoro ka arap, još malo i bit ću ka arap), čitat, štagod nacrtat, učinit koji litrat, probat poč na koji događaj iz kulture, provest se, malo višje spavat, vozački neću polagat jerbo san ga položila, neću spremat ni ispite jerbo san se i njih davno rišila, ali ću rado pomoć študentima apropo njihovih ispita kad dođu na poduke, isto vridi i za učenike ča jemaju popravne, probat ću poč na koji izlet, izist ću štagod lipo, piturat ću jedan bokun stana (to pomalo pripreman, nisan još finila), slušat ću dobru mužiku, cvrčke i more i jednostavno se uz rad i malo odmorit, zaslužila san. provedite se i vi dobro, u ponediljak je lito i službeno tu :)

split, more i znak ča promač ne more

e...

slikala san nikidan moj grad i izvadila ga iz mobitela tek sad.

split by xvii, klik za veće

tek sad, a? e a šta ću, posal, tekničke poteškoće, o' tekniko ko te izumislija, prelazak na novega operatera, podešavanje, zvanje svih mogućih službi za korisnike mali milijun put, itd. sad jeman telefon, jeman novi net i eto me... narafski da je prethodnome operateru sve uredno plaćeno isto ka i onima prije tih, ali mora bit da u ovoj zemlji takvi korisnici nikome ne tribaju, pa sve čine da ih od sebe tiraju. šta drugo reč, a? inače kad su takvi zahvati u pitanju potribno vam je najprvo puno pacijence, štagod tekničkog znanja (baš me interesira kako bi sve te službe za korisnike zva i razumija profešur povijesti oli koji advokat), a i kakva klišta, kacavidica, faz-lampica i slično isto nije na odmet jerbo štagod morete i sami provjerit.

i tako je meni pet i nešto dana net i tel. bija loš, grozan, očajan, horor film, sporiji od onega iz doba pećine i krapinskog pračovika, a onda je pukla linija. tutokompleto. nima je, ne znaju šta je, miljardu poziva, ajutoooo, ma ke... konačni odogovor: more bit da vam je otišla telefonska instalacija, pa je sami sredite. je, oču, lipi moji, sve trčen, pa da me onda čapa kogod iz t-coma za vrat jerbo more bit da su oni sljedbenik stare firme zvana pošta iz doba socijalizma koja je provukla te žice i počne vikat: ostav se mojih žica, šta tute prčkaš po njima, a? ne, nismo bili kod t-coma, od njih smo odavno za tel. otišli jerbo mislin da su ipak preskupi. za net kod njih nikad nismo ni bili. bili smo kod nekih drugih. kojih, a? ma nije ni bitno, šta ću višje mislit o njima, e... snervali su me samo tako oko ovega, a godinu dana nisu bili loši, pa se pitan se šta je, hm, a ne, ma ke, nima šanse da višje o njima mislin, e... b-net, sad će neko reč, optički kabel, za net... možda to nije loše, e... ma ke, od tih san isto otišla za net i to zaradi bezobraštine, a instalaciju fala bogu jeman i za to, ali instalacije su me višje štufale. ŠTUFALE. puno para a kad dođe do kvara uajmeeee... jema li štagod za šta ne triba instalacija, a? štagod jednostavno? štagod ča ne uzima puno mista ni vrimena ni šoldi, a? štagod kod koje firme od povjerenja, a? jema, e... škatula, ušteka se u letriku (eto samo van instalacija o' letrike triba) i jemate net i telefon. jupi, to je ono ča mi triba, uzimamo. ko daje, a? oču reč, a? ma eto oču jerbo mislim da je dobro i virujen da će dobro i ostat, a ta firma je prema meni normalna godinama. vipnet, e...


jema nešto slično i za privatne korisnike.

ništa nisan čekala, kraj peškarije sklopila ugovor u njihovom centru, odnila škatulu u ured, spojila i tel. je odma proradija. vazeli smo novi broj, kad se minja nek se minja. starom operateru ćemo platit ča još triba prema ugovoru, ali stvarnooo, nećem višje š njima poslat jemat, ma ke, e... zato nismo tili njanci pitat apropo prebačaja broja. za net san jutros malo zivkala vipovu službu za korisnike, ali tu su baš uvik bili pristojni, nadan se da će takvi i ostat i sve mi je proradilo. cijena, a? pari mi da je dosta povoljnije od ostalih, e... bit će to dobro, virujen.

poza svega tega, a i sređivanja mobitela uza sve to, i to za dva operatera, tu smo i jopet na vipa, ali nađe se kod nas štagod i od t-mobile, i popravaka tipa promini žarulju, promini šteker, itd., konačno mi sve radi. čak i četkica za zube jema nove baterije hehe. već dva dana samo se bavin naštimavanjen svega tekničkoga i kad san sila u tonobil, a s njin danas ništa nije zaštekalo, rekla san bogu fala... ja sam sritna. SRITNA, e... narafski, to ča mi je autić praktički novi 2008, ja sila u njega kad je bija 0 km (čitaj: iz autokuće) i ča je tek danas uvatija priko 3500 km i šta ga vozin ritko nima veze. auto je vrag, uvik š njin nešto. o' tekniko ko te izumislija, a?

more by xvii - klik za veće

more je na kaštelet bilo dobro, danas san bila tot. nisan tila poč na kašune, to je prekovišje konfužjuna, a ja san izmorena o' svega. oču se odmorit. kaštelet i točka. dobro je, lipo kupanje, poslin lipa pizza na zvončac. jesan sad dobro, a? ši, jesan. ka nova san, a narafski, uvik nešto sinjan, pa san tako i danas. novi znak kraj meštrovićeve galerije, tot je već nešto dana, meštrović kaže pazi... e i triba tot pazit, a ne jurit ka lud put kašuna i satrat koga, neće more uteč... bar njega u nas jema i fala ti bože da je tako jerbo da nije teško bi sve ove lipote lipe naše bilo izdurat, e...

meštrović isprid meštrovićeve galerije by xvii, klik za veće

šta je novo, a?

od jučer pozapodne vridi 021 582 634, to je novi telefonski broj od Parametar doo

sve ostalo je ostalo isto, a za puno kurjože

ćemo reč da smo broj prominili zaradi tekničkih poteškoća...

lažno važni

e... je li vas ikad tokalo jemat posla s lažno važnin sviton, a? nije, a? blago vam se, mene toka skoro svaki dan, samo ih se fala bogu rišin.

šta ti čine, a? uvik čine fintu da jemaju puno posla, omalovažavaju druge, čine druge čekat, a zapravo jemaju samo puno bezobrazluka u sebi, posla najmanje. isti vole druge i činit da ih voze i rade umisto njih itd.

sličica prva

pijen kofi s jednim likom za kojega san eto mislila da mi je kumpanjo, a poslin san zaključila da je to nikakvi i falši kumpanjo i jedno obično sebično govance oli škovaca o' čovika. dotičnome zvoni mobitel. moga je komodno toj peršoni reč dvi tri normalne riči, ali ne. on tako važan toj tako majušnoj peršoni je reka: - zvrcni me jopet za deset minuti, sad jeman punoooo posla... dobro da se i toliko udostojija reč. narafski da je i meni činija isto kad bi ga nazvala i tako pokušava sebe uzdignit do visina. tako, e, kad nije moga drugovačije, e... s vrimenom su ga ljudi prokužili pa su mu počeli govorit: - evo da ti rečen sad ili ću te zvrcnit za deset minuti jerbo znan da si u velikomeeeee poslu, a? - a kad bi poklapali slušalicu pucali su od smija, lik narafski ni dandanas ne zna da je to tako... meni se friga, moj kumpanjo više nije, meni takvi kumpanji ne tribaju.

sličica druga

nudin posla nezaposlenoj peršoni, urednoga, lipoga, na vrime plaćenoga, u njenoj struci, ali ona se preserava i kaže neka zoven nekoga drugoga o' ovih ča san ih angažirala za moju firmu, a ovi svi narafski negdi rade, u mene su honorarno. nezaposlena kaže da jema puno svoga posla (ma kojega, a?) i da će oni valjda jemat vrimena. i jemali su, zaradili, a i jopet će. nezaposlena je i dalje na biro rada i pitaj boga koliko će još bit. jedno je sigurno, kod mene višje nikad neće bit, vratili smo joj dokumente, pa neka se pravi važna materi svojoj.

sličica treća

znan i peršonu ča jema vozačku, a neće da vozi. jema noge, a neće da hoda. kila ima ka nekoliko povećih gudina, ali za to je narafski svak kriv, a ona ne. nije joj ni tantobus dobar, drugi je tribaju vozit. muž je tako ujutro vozi na posal, pa se vraća sam. u oba smjera jema oko 20 km. popodne sam dolazi po nju, a vraća se š njon šta je još po oko 20 km. dnevno oko 40 km, 20 nepotribnih, zapravo svih 40 nepotribnih, sve zaradi linosti i želje da se drugoga omalovažava. uredan tantobus tu rutu uredno vozi. narafski, da takvoj ni dota svete ane nije dosta, samo bi neko drugi za to sve triba zaradit. pozdravila san i ovu, bog je veselija, svaka joj srića, samo daleko od mene.

dakleM, ponovimo, more vam zatribat: lažno važni čine obično druge čekat, ne odgovaraju na pozive, ne odgovaraju na mailove, čine druge da ih voze i u slučaju da jemaju vozačku, a ako kojin slučajen voze, obično im je u tonobilu nekoliko fascikli da ispadne da ne znan šta važno i bitno rade. kavu nikad neće platit, sok pogotovo, to prepuštaju vama, nižoj vrsti, oni su viša, važna i nima veze ča je to lažna haha... redovito zakašnjavaju, vriđaju i sve redom omalovažavaju.

jemaju još mali milijun sličnih finti, ali ja takve uvik skontan i od sebe otkantan. i najbolje je tako jerbo je to svit ča upada u skup ča se zove krvopije, iščičat će vam živce, možđane, vrime, takujin, zdravlje itd. i na kraju će vam još reč kako su falili ča su svoje najbolje vrime i godine s vama izgubili.

koji frajer...

e... svaka poštena žena ča drži do sebe voli maške, slikaje maške, troši dil plaće na maške itd.. :)
mačak je pak nešto posebno :) vidite kako mi je danas ovi šjor pozira, puno lip i šesan a?

ugodan vikend...

moj galebe by xvii -

friško, slikano jutros mobitelom, uvećajte klikom, isplati se...

ovo je lipota za joči...

još štagod lipo o' mužike navijte za moje, tvoje, njegove, njezine, naše, vaše i njihove uši... :)
i ko to onda more platit, a?

u cvatu & riva

u cvatu by xvii - klik za veće

riva by xvii - klik za veće

repeticije

rad na crno je nešto što republika hrvatska triba strogo kažnjavati, a ne poticati dopuštanjem ilegalnih oglasa na svakom semaforu i svakom kantunu...

evo kako slobodna potiče nerad u školama, neučenje i rad na crno i to po ne znan koji put:

http://www.slobodnadalmacija.hr/Zadar/tabid/73/articleType/ArticleView/articleId/105432/Default.aspx

u zadnje vrime san pak jemala ove slučajeve:

1) mater odvela sina na crno na repeticije iz letrike. ženska koja ga je tribala učit ga je sila u kužinu, kroz vrime repeticija je kuvala kiseli kupus, malome rekla riješi sam i usporedi rješenje na kraju zbirke i sve to skupa naplatila 150,oo kn. ako sam je dobro svatila, za sat. mali je narafski jema jedan na polugodište.

onda je mater dovela sina na bilo u moju firmu, na zidu moga ureda je vidila moje diplome i vidila da nisan kuvarica vengo magistar letrike, mali je štagod tot učija i ispravija. dva sata je s pdvom platila 123, 00 kn i dobila račun. dolazi i dalje, stalno radimo, pa se nadan da će sve skupa i rezultirat povoljnim rezultatom jerbo san uvik sa dicon uspila, nisu dica blesava vengo se s njima ne radi kako triba, a matere i očevi faliju šta idu na crno. na crno je sve crno i ne zna se ni ko radi ni šta radi.

2) druga mater je odvela sina na crno na repeticije iz fizike. ženska koja ga je tribala učit je pisala i brisala i kako mi mali kaže i sama je to sve još tribala učit. ne znan koliko mu je tu paštroč naplatila, ali mali je uspija dobit 4 puta jedan isto gradivo i jedan na polugodištu.

onda je mater dovela sina na bilo u moju firmu, na zidu moga ureda je vidila moje diplome i vidila da nisan student oli oni ča je za pučku skulu vengo magistar letrike, mali je štagod tot učija i ispravija. dva sata je s pdvom platila 123, 00 kn i dobila račun. dolazi i dalje, sad i za matematiku, stalno radimo, pa se nadan da će sve skupa i rezultirat povoljnim rezultatom jerbo san uvik sa dicon uspila, nisu dica blesava vengo se s njima ne radi kako triba, a matere i očevi faliju šta idu na crno. na crno je sve crno i ne zna se ni ko radi ni šta radi.

3) ovo jedan slučaj od prije par godin, repeticije, mala otišla na crno, matematika, pokupi joj pineze i maloj reče: šta si došla, a? to bi tribala znat, greš u matematičku gimnaziju. ovu san malu kasnije učila matematiku ja, fiziku ja, informatiku ja, a došlo mi je i mnoštvo njenih prija.

4) jema i ovega, eto ti i fotanoga čovika ča je u tih na crno iša naručit prijevod. narafski da se i to spašavalo u moju firmu jerbo mu je baba na crno zavrtila google, pa šta ispadne... prevodi baba sve vrste tekstova, povoljno, haha...

itd.

oduševljena sam pričama koje mi ispričaju fotani bivši korisnici crne ekonomije. a kad ih čovik pita: dobro, a koji vas je vrag tamo sla, a? na oglas od kante o' škovaca, a? obično reču da su mislili da će proč jeftinije, ali sad vide da nije tako i više nikad neće poč na crno za bilo šta.


i još nešto. nikad na kraju godine nismo prekrcani, probleme ljudi uvik riješimo prije kraja šk. godine... radimo i vikendom. ured je klimatiziran i dica vole tu doč, pitajte ih komodno ko ih je u splitu naučija, a ko im je pisa-brisa i odnija pineze nepošteno. učimo i odrasle, a sve to puno povoljnije vengo u kužinama s kiselim kupusom. pripremamo i za natjecanja i naši učenici se uvik odlično plasiraju. http://www.parametar.hr
pametan čovik sam bira di će bit i kako će mu bit...

sidro

sidro by xvii, klik za veće

jarbol

jarbol by xvii - klik za veće

nedilja - dan za robu

e... šesne stvari, sve jedno bolje o' drugoga, a? vonju na nedilju, e... je, ši, more je jutros bilo lipo, e, ali sad se triba štagod i radit.

dok makinja pere bilu robu, psihički se pripreman za brdo robe koju triba stavit sušit i drugo brdo škure robe koju triba šumprešat... ovi litrati su s neta, a za puno kurjože makinja mi je gorenje, šumpreš delonghi, a sušilo ka to na sliku. konjić mi je nalik temu na litratu. kod mene nikad nije bilo ispomoći u za poslove u kući, nekih žena ča pomažu, peru i čiste. sve radimo mater i ja i nije nan teško. ne žalin se jerbo pošteno radit nije sramota, to je posebna vrednota i svakako je bolje oprat maje, mudante, šugamane, lancune, bičve i sl., vengo pineze - evo ovako se i danas borin za red u lipoj našoj jerbo pranje pinezi je sramota, a ne vrednota, e... ekola, gren ča, jemate pozdrav, vonje na čisto, đetrđent i omekšivač.

u nadi da će sutra bit lipše vrime...

biži ča kišo s ponistre by xvii -
slikano s moje ponistre nikidan, klik za veće