Danas su oni ča ništa ne razume i nije im kjaro njanci jedna rič zalili plavon pituron nekidan konačno postavljeni spomenik Miljenku Smoji šta je vandalski čin i za svaku osudu. Ma nije zaradi tega Smoje prikinija bit Smoje! Ma ke. Još je jači i još ga više volimo. Bila san vižitat izložbu u Državni arhiv, a arivat ću i jopet jerbo jema se tot šta vidit. Izložbu su vridno postavile Vendi Ganza Marušić i njezina sestra Herci Ganza i stvarno je dobra! Vidit ćete tu svašta, o Ajduku ča je narafski najvažnije, meštru i brijačnici, o inženjeru Duji ča je finija fakultet u pržunu kad je jedino uvatija vrimena za libre, pa sve do litrati iz Smojinoga privatnoga života. On i Ona. Onda je tu i fontana koja je nekad bila u Splitu, pa svi likovi iz Veloga mista, pa likovi iz Smojinoga života, pa vridni predmeti ka šta je Smojina makinjeta i očale. Izložba dura do 22.12 i ulaz je slobodan, Državni arhiv u Splitu ( odma do Pomorskog muzeja), bogata je i jako dobra, ja ću je poč vidit opet jerbo jema se tu šta vidit. Pozvonite za uč unutra.
A kako znan Vendi? Od malena. Više smo partija briškule i trešete odigrale vengo bi Smoje moga opisat. I svega drugoga ča mladost nosi. Slikali smo se kako priliči, a oni koji nas znaju od prije mogu reč jesmo li puno ostarili. Split se prominija, prominili su se i ljudi, ali rič, ta lipa spl'iska rič nije utekla iz naših ❤️.
Nema komentara:
Objavi komentar