e... gren van ovod izvuč par lipih bokunića iz današnjega dana.
digla san se rano, a ko rano rani dvi sriće grabi.
kupila san lipu peku na skonto za 5kn
(ovo mi je važno naglasit jerbo san uvik sritna kad nađen kruv na akciji oli skonto jerbo stvarno mislin da je doša brezobrazno preskup).
još je bila tepla.
feta friškoga kruva, malo masla i marmelade priko nje,
kofi laganini, brez priše i
eto ti već divote.
zalila san moje cviće.
puno kurjožen svitu gren reč šta je novega na mom balkonu.
ka šta vidite na gornji litrat, ivančica oli margarita mi sad reste u gredicu,
u istu san gredicu pribacila i ono cviće iz druge čizme, to bi tribalo bit štagod šareno.
neko će me sad pitat šta ti selen čini u pitaru?
domaći, za juvu, e... sićate li se kad san to sadila, a?
poticaje još nisan dobila,hehe, a od onda san izila juva i juva s dodatkon domaćeg selena, a petrsimul se sadija nikoliko puti i još će...
jeman i običnu travu u pitaru. to mi je za maške. maška ka ča znate ili ne znate, pa ćete sad naučit, mora izist malo travčica jerbo joj je to potribno za normalno funkcioniranje, liže se, štumik joj bude pun dlake, pa da ih more lakše izbacit iz sebe.
u prvi red je turski gariful, jedino ča me zanima od turčina.
ja ne gledan ni njihove ni nijedne druge sapunice.
gariful ću uskoro pribacit iz ova dva pitara u štagod veće jerbo reste ka lud.
otišla san na more i vratila se s njega prije konfužjuna i najvećih celzijusa.
za puno kurjože evo jedan litrat.
boršu i šugaman san stavila jušto o' ispod tega velikoga bora,
skočila u more, buč-buč,
isplivala se dobro,
gledala brodove svake vrsti i doma.
jerbo, za obid su punjene paprike. i pire. đelato i dinja. uajme.
pozapodne ću bacit joko na alku,
ako buden od volje, a morat ću, šumprešat ću štagod robe
i sredit štagod kartušine za posal.
malo mira o' jedne od ritkih neradnih nedilja.
guštan.
ši, ja odavno radin, službeni urlap je malo bija zato ča je mora i finija. meni plivanje dura 6 miseci na godinu, ali ka ča znate ni šeik ne more jemat toliki urlap, pa se kupan kad uvatin vrimena, a kad moran radit, radin.
Nema komentara:
Objavi komentar