petak, 3. svibnja 2013.

još uvik želin isto....

e...

jema jedna stara spliska rič. gre ovako: poteštat. more bit da mlađi i neće znat ča ona oče reč, e... tako je govorija moj dida, e... evo, probat ću van ovod, na ovi moj blog, dat par rigi o toj riči.

po meni bi najbolji poteštat...
splita triba bit čovik koji je splićanin - taj bi valjda bokun i volija ovi grad, pa mu ne bi palo na pamet činit kojekakve arlekinade ka ča je recimo sadašnja spliska riva... teško je nač pravoga splićanina o' kolina, onega ča mu je ovod rođena bar mater, baba i prababa, znan. zato ćemo malo i spust kriterije. ajmo onda reč da ne mora bit o' kolina, a ni fetivi jerbo poza svih mišanja i pritumbavanja teško je takvoga nač. dakleM, dosta je čovik ča živi i radi u splitu i eto neka je u splitu barenko 10 oli 15 godin - to je neko vrime ča je potribno da se nauče ulice i kvartovi u jedan grad, da se bokun kultivira oni ča nije o' urbanoga đira, da se nauči di se tonobilon smi, a di ne more tj. di je pješačka zona, da se nauče najvažnija poduzeća ča su u split, najvažnije užance jednega grada, njegov svetac zaštitnik itd. ajmo ča dalje, triba bi ti šjor oli gospoja bit i neka peršona ča nije krela i ča joj barenko uža fameja nije upetljana u marčapiju, privatizacijske monade, afere, škandale. ne bi ja tila ni da je ta peršona neko linguzo biće jerbo kakvi će nam onda grad bit, a? ako je peršona vridna, šetat će po splitu, gledat će di su svi problemi - o' buža na trotoarima koje će onda dat tašelat da se neko ne polomi priko njih kičmu oli ne slomije tak, ruku, nos pa do svita ča mižerjasto živi kojima će onda probat pomoć kakvom humanitarnom akcijom i slično. vodit će računa da nima konfužjuna liti na vaporu i ferati, a i da split ne bude pun škovaca. ne bi bilo loše da ta peršona zna i koji strani jezik, barenko ingleški, francuski za ona vrimena kad nam u vižite dođe koji gost iz kojega grada kumpanja/prijatelja koje furešte zemlje. tribala bi se ta peršona i znat obuč ka čovik, šesno, s ukusom i znat suvislo i kulturno složit dvi tri rečenice. tribat će i to kad se otvaraju sportska takmičenja u najsportskiji grad na svitu. ne daj bože da ta peršona ne zna kulturno sidit za stolon i izist ka ča nalaže bon ton, to bi bija paf gaf kad nam stignu vižite, e... ča još reč, a? poteštat kojega bi ja tila bi triba bit pošten, vridan, preženca o' čovika i da voli bokunić i ovi grad a ne samo svoju gujicu. triba bi zapravo to bit čovik ča će ćutit split cilon svojon dušon, e... eto, da je jednega takvoga nač, pa da nam bude cili split rascvala grana... e, bravo... poteštat je za one ča ne znaju gradonačelnik, e... ekola, gren ča, veseli i zdravi bili!
 

inače, ovo je jedan moj tekst iz 2009, ali mi se želje nisu prominile, pa može proč i danas
 

Nema komentara:

Šufit