četvrtak, 27. studenoga 2014.

litrat sa šufita


e evo jedan litrat sa šufita, slikan davno o' strane moje malenkosti. ovo je lanterna zelene kolure na ulazu u spli'ski porat. sad su tamo veliki radovi, gradi se nova điga na koju će pristajat kruzeri. danas je padala i kiša, a tokalo me i radit, pa nisan baš puno šetala osin jutros najranije ono malo do zvončaca i nazad u čizme. za kišu, e... ma neka i nje, triba priroda učinit svoje, nije ni normalno da se u jedanaesti misec gre na bananje, a da u osmi pada snig. balin laganini, znan. neću ni reč sve ča bi tribalo jerbo ako počnen, neću znat fermat. ka da ne znate i sami da dura gnjila južina, e... zato mi je bolje čekat da loše vrime fini i činit kuco. kurbin pir lakše prođe uza bokun lipote koja je ka se mrvu bolje ošervaš svugdi oko nas. tutokompleto san u radu, studentima su kolokviji, pa im triba pokazat štagod, a i želin nešto dobro napravit, pa jeman posla i oko te ideje. ne obadajen svaku zmiju šta sikće kraj puta, radin svoj posal. sritna san kad me nazovu ka danas i reču: stavili su nan rezultate, 90% jeman točno, fala van šta ste mi pokazali. eto tako to biva kad se najprvo vridno uči, a poslin vridno radi. neka pati koga smeta. u teku san napisala sve ča san ovih dan radila, a znan da je šjor ministru mirandu mrsiću lakše virovat da se kod mene gata u fažol, pa neka viruje u to ako ga to veseli jerbo ionako ništa od onoga ča san notala u teku odrađenog gradiva ne bi razumija 
ekola, gren ča, jemate pozdrav!

Nema komentara:

Šufit