nedjelja, 26. veljače 2012.

par besida na kraju šetimane

e... tokalo me ovi vikend obavit puno posla. najprvo san u petak prije prvih pivaca utrnila žveljarnin koji da van pravo rečen i višje nije žveljarin, vengo mobitel, ali radi isto ča je činija žveljarin, a to oče reč: drnda i budi dok ne probudi.

di se odilo, a? daleko, na drugi kraj splita, a meni ditetu s manuša to pari da san išla na drugi kraj svita. taj dil splita je moj pokojni dida zva trščenica, ali ako van rečen da san odila na trščenicu, ne virujen baš da će puno svita znat di je to, e... očemo li otkrit i tu tajnu, a? di je trščenica, a? e to van je na lovrinac, lipi moji.

ako me tokalo poč na lovrinac, kako onda sad ovo notajen, a? nažalost malobrojnih neprijatelja oli dušmanina i radost velikog broja kumpanji oli prijatelja, živa san. nisan još partila, ma ke, e... a oli tamo ne more poč i živ čovik kojin poslon, a? recimo ka ča san ja odvezla tonobil na servis, e... (u gašperova koji je isto tot, e...) i dok dura servis odnit malo cvića mome pokojnome didi i pokojnoj babi od kojih san i naučila spli'ski govor.

ka se mrvu bolje promislin, naučila san ga o' dide jerbo moja pokojna baba, a ona je bila baš o' stare spli'ske fameje ivančić, i nije isprid mene forsirala tutokompleto stare spli'ske riči jerbo je virovala da dica upijaju ka i spužve i da ako naučin govorit postol, da ću i u skuli reč postol umisto cipela i da ću dobit asa u rvacki zaradi tega ča se u skuli triba govorit književno, a ne po spli'sku. virovala je i da ako rečen šuferin umisto žigica oli šibica, niko ni neće razumit ča govorin. dida me je naučija sve spli'ske riči koje znan, a on ih je čuja o' svoje matere. moj dida je bija rođen 1922. to da ga morete smistit u vrime jerbo jema i još starijih riči, ali ako ih on nije dupera, ne duperan ih ni ja; neka se o takvim ričima čita u kakav rječnik oli po starin kartolinama.

e bravo, ka smo već kod kartolini, evo sad san se sitila da bi bilo dobro ovod stivat jednu iz 1922. 
pogled s merjana, 1922. - klik za veće

ovo je za mlaje. da vide kako je bilo lipo prije višala. prije duševno bolesnih peršona ča su unakazile i split i rvacku.

didi san narafski ispripovidila kako je bilo na krnjevalu lita gospodnjega 2012.  i kako san izblesirala luku bebića. znan da mi je dida gušta samo tako kad san mu rekla ča je bilo. :p

ajmo ča dalje? kad san već na drugon kraju svita, tribalo je odit i u veliku butigu u kojoj je butiga do butige, a zove se city centar one. asti sto, kad tot dođen, triba mi nikoliko uri za obač svaki pod i uč u barenko svaku treću butigu. nisan vazela bogznašta jerbo mi je tonobil još u gašperova, jušto onoliko koliko san mogla teglit, e... uto me je zvalo da su finili s tonobilon i narafski, kad san se vratila na manuš, bila san sritna ča san našla misto za tonobil samo 10 minuti hoda o' kuće. poslin san ga selila bliže. eto ča ti je radni dan.

očemo li još jednu kartolinu, a? očemo. ajmo malo predahnit prije vengo opišen subotu i nedilju. ono ča bi rekli fermat i uvatit arije.



riva 1935. - klik za veće

narafski, najbolja moguća vijest je da bi se ružna višala konačno mogla maknit s rive. izgleda da bi se to moglo dogodit. ja se nadan da oče jerbo postavljanje višala na rivu je kulturni zločin i da se mene pita svi oni koji su u temu učestvovali bi tribali bit kažnjeni. narafski, proč će ti likovi lišo, a mi ćemo bit sritni ako se višala ikad rišimo. živi bili, pa vidili. ako nova vlast/ministarstvo, to uspije, kod mene će odma dobit jedan punat i za iduće izbore. ako ukinu privilegije uhleb sektoru, dajen dva punta, a ako brez privilegija ostane mesić i crikva, dajen tri punta. da će teč med i mliko, to je narafski sajns fikšn, hdz je i prikovišje ukakija i tribat će godine rada i to teškoga rada, težega od radnih akcija koje je organizira drug tito, da se ova zemlja digne i jopet na noge.

vengo, kad san već kod mlika, gledan ovi demonštracijun mlikara na tv, gledan mliko koje se proliva i mislin se koja grijota, je li se to moglo dat sirotinji, a? i još se nešto mislin. svak jema prav na demonštracijun i bit nezadovoljan i fotan, ali jema li prav borbon za svoja prava drugima narušavat prava, a? pravo na slobodu kretnja je pravo nekoga drugoga čovika, čovika koji oče proč tim cestama. i još mi nešto nije kjaro. viče se, demonštrira se, a ča država jema s tržišnon cinon mlika, a? po toj cini ga prerađivači oče otkupit, višje ne daju i ča sad tu more premijer milanović, a? da van pravo rečen i ja bi rado svoj rad cinila višje. da bi mogla radit, morala san velike skule finit. moren i ja sad blokirat marmontovu i počet vikat da oču da mi višje plate za repeticije i da ako ne bude tako, oču hitnu smjenu ministra jovanovića a ni on ni ministarstvo prosvjete zapravo s mojin poduzećen nima ništa. a šta on jema s tin, a?  mi ni nismo pod njegovon ingerencijon. cina je tolika kolika je, a to je ono šta tržište more platit i to je to. kako će seljačaka buna finit, vidit ćemo. razumin da su mlikari fotani, ne razumin neke postupke koji se oko tega svega događaju.

ajde da van još špijan ča je bilo u subotu i nedilju. šta, a? rad. rad, e... subota i nedilja, pa rad, kako to, a? pitat će sad neki. rad je kod mene uvik, kad radin i zaradin, neće mi dat ni državni proračun, a nisan ni te sriće da dobijen na loto. doduše, ne igran igre na sriću, pa ti tiket o' lota, binga i raznoraznih pota ne bi imala ni mota ispunit.

a šta činin sa šoldima, a? ka i svi drugi, dobro mi dođu za kruv i mliko (ja mislin da je mliko skupo, moren li negdi demonstrirat ka potrošač, a?), čaj (dobro će doč i on kad ne bude mlika), ostalu spizu, režije, robu, troškove oko tonobila i sl. danas san platila nike režije, ali onu o' komunalija nisan još. protestiran, bunin se. ovi misec je pa snig. grad je bija neočišćen. pun sniga, leda i škovaca. je li čistoća mirita plaću za ovi misec, a? a poteštat, a? oče li ih bit sramota primit plaću poza onoliko slomivenih (ne smi se ni reč koliko, to je narafski, državna tajna) i poza štete koju su mi pričinili. i meni i ostalima koji od rada žive. ajme, fotana san, da mi je sad dovatit koga o' tih likova koji NISU radili svoj posal kad je pa snig, jo ča bi me čuja. komunalije ću platit zadnji dan ovega miseca. daklem, kerume čekaj još i budi sritan da ti to opče i platin, e...

gren malo laškat. promislit ću sad na dvi dobre riči. one su isto bile važne ovu šetimanu, e. koje, a? rižot i paradižot . zaradi čega, a? e to mi je lipi obid i lipa goluzarija za danas, skuvala moja mater, lipo i šesno, jerbo joj je danas rođendan. triba posebno napomenit da je rižot bija o' plodova mora, za prste polizat, a mojoj materi i ovin puten čestitan rođendan i želin još puno dobrih i veselih godina.

jerbo, ča je život, a? šaka suza, vrića smija, ča je život vengo fantažija...

Nema komentara:

Šufit