e...
još malo pa će maškare.
stavit ćemo ko moretu ko škartoc na glavu i barenko na jedan dan zaboravit na brige.
to san ča jesan i nikad se na zamaškaran prikovišje, ali mi je u maškare interesantno poč zaradi iljadu koluri, zaradi šetence, zaradi krnje, zaradi tega ča volin pripoznat poznate kad čine fintu da su nepoznati itd.
krnje je kriv ča je živ, zaradi tega će ga polit petroljen i užgat. bit će kriv i ka krepa i oni ča je stvarno kriv more se smijat dok je živ sve dok bidan krnje plati buletu.
moderno je poč u demonštracijun. tribali bi svi krnje iz lipe naše ovih dana bit solidarni i poč u jedan veliki demonštracijun, pa neka jedan put bude kriv oni ča je stvarno kriv, imenon i prezimenon, a ne uvik bidni krnje samo zato ča je bija živ oli ča je činija fintu da je živ. dikod mi stvarno bude žaj bidnoga krnje, e...
spli'ske maškare nikad nisu bile fine i šesne ka one iz rijeke. rijeka je spektakl, a spli'ske i kaštelanske maškare su satira, teška sprdačina. tot nije samo bit cvitić oli bubamara, jemat glamurozni kostim ča mami uzdahe, to su maškare koje čine šprd. teški. ne, nisu fine. okrutno su iskrene. kolet spli'skoj maškari obično ne vonje na kolonju i parfume. ona zna bit greza. katkad i priko mire. ona beštima, prdeca i rutaje. vata za čiče. smije se da se sve ori. ona i kritizira. da, da, kritizira. ona se ne miri sa optimizmom koji nan je hdz vratija (bog im da da im se cile fameje smiju od uva do uva u toj zemlji znanja, sriće, optimizma i blagostanja i to jušto onako kako se zaradi njih danas smije svaki pošten čovik).
ove je godine bilo puno tega ča su maškare sigurno sinjale. jadranka kosor i željko kerum su puno lipo parlali sve jezike, rvacki, ingleški. kad furešti uspiju doznat da postojimo i stignu u lipu našu, oni ih straše i plaše. da ne bi slučajno došli i jopet oli rekli kojemu kumpanju da dođe. ivo sanader je završija u pržunu, ali i sasvin solidno uteka rvackin organima gonjenja. sad je meštar sviju hulja i narafski ka i krnje je za sve kriv, a svi drugi bidni nisu ništa znali. svit je izaša na ulice jerbo se prilija pjat. u ovoj zemlji se tražija jedan čoban, a ispalo je da ih triba 150. ofce niko neće da čuva, a svit sve manje želi bit ofca. voda je voda, a šparat će se i na spajalicama, ali će kosorica i nadalje poč na litovanje u pet zvizdica ka i godine svake. asti sto, materijala za spli'ske maškare, maškare ča su uvik znale išprdit, koliko očeš. jedva čekan.
a ča ću bit, a? ricastu periku sigurno neću kupit jerbo mi je kosa prirodno ricasta i ne tribaju mi falše rice, pa možda buden liša, ali liša i lišina narafski ne znači isto, pa sigurno neću bit brez punta, e... nešto ćemo već smislit, ali teško ću bit klaun, vištica, vila i ricavica jerbo su tega pune butige. zamaškaran se tek simbolično, vidili ste nikidan maškarani vremeplov, ali u te maškare sigurno gren sa svrhon i razlogon. a i učinit litrate, bogu fala. vrime je krnjevala. stavi moretu, izi krafen, zapivaj, zabalaj, nasmiji se, razveseli se... život nima reprizu.
Nema komentara:
Objavi komentar