tot smo započeli, e... bija je to laganini uvod u ostale štorije o njemu, e... njegovon visočanstvu zvanon dalmatinac tipični, e... komodno ga morete zvat visočanstvo oli visost jerbo tipični primjerak o' vrste obično jema minimalno 1.80 m oliti 180 cm. sve o' ispod tega je ritkost. da ih je stivat u kinu oli italiju, odma bi ih odvelo na proučavanje ka novu vrst, vikali bi ajuto (upomoć), arivali su guliveri, e...
već smo rekli da je dikad lin ka krava, e... a skoro pa uvik je tvrdoglav ka tovar. omiljena zanimacija mu je karanje. ako se odavno nije kara, nije svoj. more van se od tih tipičnih čak dogodit da i čujete: mala, mala, oču se karat jerbo više brez karanja ne moren. znači, još će van i najavit da oče činit škandale, da oče da se sve ori, da oče nos u ariju, da oče brezveze arčit kune na mobitel. nemojte opče bit iznenađene i ostat deštuko (paf) ako to učini, karanje mu je spiza za dušu (koja je ustvari skroz dobra i plemenita, ali to morate čitat o' iza rigi teksta ča se zove dalmatinac tipični, e) i on mora jemat tu spizu.
povod za karanje mu opče neće bit teško izmislit jerbo on jema svoj sveti cilj; oče se karat, a poslin mirit. znači, uvik ćete bit za nešto krive, on će (namjerno) krivo protumačit ono ča ste mu rekle oli stavile u pjat (ili bilo šta drugo) jerbo zapamtite on se ti momenat oče karat. lipo van je to i reka. i šta sad više očete, a? zaradi nečega se mora počet karat, a kako se neće karat s nekin brezveze, vengo baš s vama onda ste mu i vi narafski krive za nešto, e..
narafski, neće on ti momenat birat ni misto ni vrime, karanje je najvažnije, e... ako niste blizu, zvat će vas na mobitel i karat će se tako, e.. miran će bit tek kad mu poklopite slušalicu. onda vas more zvat i jopet i to će narafski učinit. ako jemate volje i živaca, javite mu se... mora se još malo karat. kad ga budete pitali: a dobro, a zašto me više zoveš, a? čut ćete: tako da znaš, zoven te jerbo oču arčit kune sa mobitela, a za tebe me opče nije briga; a već za pet minuti će van vikat tako da će van skoro probit bubnjić o' uva: zoven te jerbo te oču čut. morete mislit, oče vas čut, a ti momenat je nervožast tutokompleto, ni sam ne zna više ča govori, e...onda će on vama poklopit tu slušalicu jerbo morate bit kvit, a i da bi vas za pet minuti i jopet zva... mora bit tako zaradi teatra i dramatičnosti, e... a triba van i još štagod reč. ako vozite, moj savit van je da dok se on kara parkirate tonobil. fermajte, nećete valjda dozvolit sebi da koga satarete dok famozno karanje dura i da poslin završite u pržunu, e...
e poza tega se nikoliko uri neće dogodit ništa. on je sad svoj, a vi niste. budite pametne, ne uzimajte ga za ozbiljno, nećete se valjda zaradi dalmatinca tipičnoga nervirat, e... lipo guštajte, na ovu vrućinu se morete obanjat, zimi morete poč učinit novu frizuru oli kod prijateljice na ćakulu... šta god očete. jemate dvi tri ure mira, iskoristite ih na najbolji mogući način, e...
nakon tega eto ga jopet. sad se oče mirit jerbo zaradi tega se i kara. malo će mu bit teško reč skužaj, zapravo on bi prije umra vengo tu rič reka, ali ako jemate sriće ipak će je prošapjat. to da ga niko ne čuje, e... jerbo, a šta će svit reč, a? ako nimate sriće, sve će proč brez riči skužaj i život gre naprid. do idućega karanja, e... jemate li force za takve, a? ako nimate i ako mislite da to ne morete izdurat, najbolje van je odma kupit kartu za nešto ča nije dalmacija, e... no, uvik triba bit atento, jema ih recimo i po zagrebu, e... kako ćete odma znat da su to oni, a? lipo, nose more u jočima, e... a ako je virovat miši kovaču i kadenu oko vrata, e... :o)
gren ča, jemate pozdrav!
--------------------------------
by xvii 24.07.2005.
ovi tekst je bija na internetu i kako san već nikidan rekla prvi dil bloga o' xvii ča je bija kod našega blog servisa je nesta jerbo je taj blog servis nesta. blog servis na kojen sad pišen drži google, za njega ipak ne virujen da će propast, a čitatelji su tražili da ovo ponovin, pa im ugađan. nastavit će se, ima još, e...
.jpg)