e... narafski da ono nikidan nisu bili svi litrati koje san učinila ka san slikala katalinka, jeman ja tega još e...
a da van pravo rečen na katalinića brig se, iako živin u split, nisan popela dobrih dvadeset godin.
ka san nikidan došla tamo ostala san paf.
katalinka je lipo tutokompleto sredilo, svako caklo je cilo, a da je proradija to san znala i brez da mi reče špiker na tv.
jema već neko vrime da radi, e... jednu mi je noć jednostavno počelo tuč svitlo u joči. je, seže to svitlo sve do moje postelje. čujen ja i feratu ka zazvižđe.
noć zna bit puna zvukova i kolura.
čujen i suside ka na jeftiniju letriku uključe mašinu i peru robu.
čujen i svoju makinju kad pere na nižu tarifu.
čujen i mulariju kad u bot gre vanka.
čujen i promislin se: zračne nike patike, iphone, neznanje tablice množenja i mogo čega još.
izlazi se u bot, vraća se u podne, lipo.
po grada živi od kurvarluka, druga polovica od dilanja i šverca.
šesno, narafski.
ne more bolje, e...
i onda kad je poslin nikih dvadeset i kusur godin zasvitlija katalinko, ni mi bilo krivo. dobro dođe svitlo za guske u magli, e...
u pet ujutro mi je maška flekica uletila u sobu.
stara spli'ska rič je kamara, ali ako je napišen, neće niko razumit ča san rekla.
more bit malo ko i da oče, ali to je malo.
pripala se svitla i odma skočila na armerun.
poslin san jemala monadu da je kalan doli.
maška ka maška, kalala se sama kad je to tila i poželila, a ja san sama popravila roletu da nan svitlo više ne tuče u ćivericu iako mi je bilo skroz drago ka san skontala da je proradija.
jerbo, neka svitla, gruba su vrimena, svako svitlo dobro dođe.
Nema komentara:
Objavi komentar