lipo san piturala brod

lipo san piturala brod.
to triba učinit svako par godin
ako očeš da dura i da se ne rastoči.
sašila san i nova jidra.
vitar će bit kako bog da,
izmišat će se malo prošlosti,
sadašnjost,
vira u budućnost.
niman prikovišje pinezi,
pa niman ni brod ka šeik.
zapravo opće niman brod.
još.
ovaj je tek iz mašte moje...
mali,
drveni brod.
na njemu sve je šesno.
drven je,
lipo pituran.
jema provu lipe forme,
kabinu.
unutra sve čisto,
ne vonje na friškinu.
uglavnom.
njime dikod ulovin samo jednu ribu,
digod pun sič,
digod cilu kašetu,
a jema i dana kad su pošte prazne.
nekad se na tunju obisi
i stari, probužani postol.
nima veze,
ne moš uvik jemat sve,
dikod je bolje,
dikod gore,
sve je to za čovika.
kad sve punte zbrojin ipak nije loše.
važno je da je brod pituran,
čist
i da gre.
odvest će me u godine nove,
ukrcat ću sa sebon samo dobar svit.
loših san se fala bogu rišila.
lipo san piturala brod.
moj mali,
drveni brod.