srijeda, 25. kolovoza 2010.

riceta za sriću

klasa optimist by xvii

e... odlučila san ne mislit o krizi i recesiji, o vladi, o lupežima i kurbinim sinovima, zločeston svitu, i sl. mislija ti oli ne mislija čovik moj, ništa se prominit neće. dok se ti zaradi takvih nerviraš i sekiraš, oni pucaju o sriće, a narafski nabijaju i kile. takve nezdrave stvari triba jednostavno potirat ča iz ćiverice i reč u mojoj glavi jema mista samo za dobre stvari. nije me mater rodila da patin, vengo da buden sritna. zato ja sebi uvik nađen malo radosti. a ča bi to moglo bit, a? svašta, probajte i vi, vidit ćete da je dobro. dignen se ujutro najranije, a malo prije tega, u zoru, ležin u velikoj postelji i slušan tiče kako lipo pivaju. lancuni i intimela mi uvik mirišu na čisto. ujutro izin tepli kruv i masla, nekad stavin i marmelade. ako van je tlaka poč u butigu ujutro najranije, jednostavno ga zgrijite u tosteru. ružne poruke i mailove obrišen i višje o njima ne razmišljan, lipe pročitan još jedanput. stavin dobar cd u player, a lipu kolonju na se. vonji su itekako važni. je, je, kad vam se neko tutokompleto svidi to je upravo zaradi vonja, ma koliko vi mislili da su mu oči lipe, uši šesne, da je zgodan, šarmantan, markantan, da mu takujin pun oli prazan (o ovemu misle i muški i ženske, ali nema sriće kad se srića na temu zasniva, virujte mi), itd. za mozak narafski neću ništa reč. muški um mi je jedno tako nevjerojatno područje. zaradi tega mi je digod i žaj ča nisan otišla na koje študije di bi se proučavalo tako nevjerojatnu pojavu, e... vengo, di smo ono stali, a? a, e, vonj, e... dikad užgen i koju lipu mirišljavu šteriku. otvorin ponistru i gledan split i more. stalno tražin i nalazin interesantne libre za čitat i filmove za gledat. učinin koji lipi litrat oli sliku. plivan. dišen borovinu. slušan cvrčke. nađen koje dobro misto ka ča je ovo na sliku o' jučer, sidnen i mislin pozitivno. pogledan put pučine, zaboravin na sve divljake i probleme. veselin se malin stvarima jerbo srića i je u njima. nikoga pametnoga još nije usrićila jahta, tonobil, velika kuća. jemaju mnogi judi to, pa su i jopet sami, nesritni, pijani, puni antidepresiva i pokušaja samoubojstva/ubojstava. promislin na drage ljude. promislin na sve dobro ča mi se u temu danu dogodilo. pomazin moje maške. daden štagod izist i maškama ča su na ulici. udahnen duboko kad sunce gre leč i rečen: ala lipote. onda, koliko mi pinezi piza srića, a? a praktički nula kuna, e... zato se i zove srića, a ne prihod, renta, dividenda, dobit i sl. ne virujete, a? ajde pročitajte sve ča san nabrojila i probajte učinit isto. dobro, ok, ako ne volite maslo, namažite nutelu. probajte svaki dan nešto od toga ili sve. izbacite iz glave sve škovace i mislite na dobre i pozitivne stvari. je, triba i pinezi, ali oni nam tribaju za priživit, a ne za se iživit. odbacite glupe i nepotrebne troškove. umisto po butigama, šetajte po merjanu oli uz more. probajte se sutra dignit uru ranije, učinit sebi oli drugima nešto lipo i vidit ćete da san jemala prav. kroza život nisan jemala puno pinezi, a uvik san bila sritna peršona. narafski, ako baš mislite da bi vas oni mogli usrićit, onda ih zaradite. i to se može kad se oče. samo, vidit ćete da oni neće apsolutno ništa prominit u vašoj srići oli nesrići, (znan iz iskustva kad naplatimo posal, nisan ništa manje oli više sritna kad pinezi arivaju, e ), a čisti lancuni i intimela oče. ne virujete? je, tako je to, jušto tako, ali da bi čovik išta u svom životu prominija, triba najprvo prominit stanje uma. muškima će to bit malo teže, znan, ali uz trud i zalaganje more se. ekola, gren ča, jemate pozdrav!

fantažija by xvii

Nema komentara:

Šufit