e... izgubit busolu, e... znate ča to oče reč, a?
splićani će znat, a oni drugi neće, ma friga mi se. izgubit busolu ne znači poludit tutokompleto, pa vazest kalašnjikov i pobit po pjace oli rive, a u najgoren slučaju pun ajdukov stadion. to je jušto to, poludit tutokompleto.
izgubit busolu je nešto drugo, barenko za moj pojam.
znaš ono ka si višje štuf svega, kad višje ne moš izdržat, kad ti se prilije pjat, kad višje ne moš kupit u sebi, kad je dosta svega, kad si odlučija reč finito, ali ti je toliko prikipilo da to neš učinit na miran način, e...
švogat ćeš se onda na nevinin susidima koji kad se mrvu boje promisliš i nisu baš nevini i mili ka janjci, pa ćeš im zbrojit sve punte, dodat ćeš čak i lišine, i reč ča ih pripada, a i malo višje oli i di koju besidu koju njanci pas s maslon ne bi poliza. zapravo puno takvih besida. poslin ćeš dvi ure dolazit sebi, u boljen slučaju učinit ćeš kamomilu, a u goren stavit krpu o kvasine priko ćiverice, ali narafski ni susid/a zaradi koje si izgubija busolu neće proč lišo. ako je neko drugi izgubija busolu, pa učinija isto, smijat ćeš se o' uva do uva jerbo se baš onda kad se izgubi busola moredu čut najlipje i najžešće riči o' pravoga, sočnoga čašćenja ričima koje je samo u split tako kako je.
narafski, opće nigdi nije definirano da samo nevini susidi mogu ogrist. dikad to more bit i profešur u skuli. recimo, ka je jedan izgubija busolu na elektroteknički fakultet, švoga se na način da je aktivira pompjerski aparat i pina se raširila po cilom hodniku di je bila kapunjera o' onega zaradi kojega je izgubija busolu. sićan se i rumbanih vrata u elektrotekničku skulu ka je jedan drugi isto izgubija busolu. narafski, nije poželjno gubit busolu tako da jema materijalne štete, pa potegnit stinon u cakal oli probužat gume o' tonobila oli barenko bičiklete i slično jerbo je onda obično triba i namirivat, ali ono, kad poteče potok, ma ča potok, rika lipih riči, e to najvolin i ka ča san već temeljito objasnila najbolje je kad čuješ kako se drugi itaju ričima.
ka se karaju u dalmaciji narafski oče reč svađaju. baš tako jerbo kontreštavanje je nešto drugo, to je razmina mišljenja ufino, a karanje je isto to samo ugrubo.
karat mi se triba, karat se oču - reka je jednom boris dvornik, a to ti je i jopet malo drugovačiji poriv kad ti tako dođe jerbo onda u čin karanja greš smišljeno, s predumišljajen i dobrano guštaš u temu; recimo ka ja kad san bila ogadit onu glavnu o financija u grad split, sićate se, ono, kad je došla na pripametne ideje kako će mi ukrest pineze iz takujina. e onda san joj tot u tu kancelariju di je do tega dana glumila niku veličinu ka da je kleopatra oli koja druga važna faca rekla sve ča je pripada i pri tome san guštala. da san izgubila busolu, e, onda bi mi poslin tribala kamomila, a ja san se vraćala pivajući. doduše šotovoće, da ne strašin svit ča šeta po rivi u višegodišnjoj izgradnji, jerbo ne znan pivat, ali bolje ikako, vengo nikako.
značit kontreštavat je jedno, karat se drugo, izgubit busolu treće, poludit tutokompleto četvrto.
ne triba mišat te pojmove.
di se još more izgubit busola, a? po butigama, u banku, poštu i sl. kad svit neće da čeka filu, vengo trče priko reda, svakako. kod šefa isto. doma, zaradi fameje isto. riđe zaradi beštija. najčešće zaradi zviri ča se čovikon zove. kad greš po kapunjerama o' državnih i javnih službenika je pravo čudo ako je ne izgubiš. mirakul, e... dalje, na ostavinskin raspravama, brakorazvodnim parnicama, sastanku kućnog savjeta, svin ostalin sastancima, od onega radničkoga savjeta iz mračnog doba socijalizma i socijalističkog samoupravljanja, priko partijskog i svih inih, pa do današnjih iz doba svitloga nazovi kapitalizma ča se sastanče od jutra do sutra u svrhu poboljšanja neproduktivnosti. more li se još di izgubit busola, a? da more li, e, uajme koje pitanje, a? evo recimo kad ja gledan ajduka i kad vidin da mu sudac bezočno krede, ono, ka da je stavija šal o' dinama i doša tako okićen sudit, odma izgubin busolu, pa mu vičen sve one riči koje mu triba reč, grijota je samo ča me ne čuje , ne morejerbo na poljud nisan bila skoro 20 godin. narafski, moš bit toliko fotan da izgubiš busolu i na sastancima filatelističkog društva oli kluba ljubitelja šaha jerbo uvik ti neko digne tlak, nekoga ti je višje dosta, gotovo je finito, ili ćeš mu reč ča mirita ili ćeš krepat. busola se žestoko more izgubit i na peškariji oli na pazaru, a posebna su gubljenja kad voziš tonobil splitom koji kroza jutro pari indija a to je ka ča znate iz pučke skule ona zemlja na istoku u kojoj vlada tutokompleto konfužjun, ali kako kažu oni jemaju nike posebne filozofije i unutarnji mir i tamo se busole ne gube. ko će znat je li to istina, a? i di bi na kraju čovik triba poč a da je stvarno ne gubi, a? na zapadu bi bilo još luđe o' velikoga stresa, pa bi brzo puka film (ovo je davno sklepano, ali je sad u eri digitalaca za muzej i više ni ne zvuči strašno ozbiljno, e) , na jugu bi moga guštat sa šimijama, nilskin konjima, konkondrilima, elefantima i žirafama, a na sjeveru bi ti se smrzla gujica. duša i tilo.
i na kraju, nima mi druge, vengo stoj tu di jesi, dikad čini kuco, dikad reci. :D
Nema komentara:
Objavi komentar