petak, 2. kolovoza 2013.

šta je meni ovo tribalo?

e...

jučer san puno tila gledat vaterpolo kontra mađara, ali mi je falija 4. kanal, a prijenos je iša baš na 4. 

kako to nisi prije namistila, a? čujen kako pitate. ma friga se meni za tv, opče ga ne gledan puno. dikod se pitan zaradi čega opče plaćan pretplatu i cable tv. tu ka jeman puste programe, a barcelonu koju volin gledat kad god igra ne moren vidit. naši će možda prinit finale lige prvaka i to je ka to. za vidit barcelonu bi mi tribalo poč još dat pinezi za tv i poč i kod t-com.
je oču, sigurno i da onda samo radin za tv pretplate, a tv ne bi vidila njanci ovo malo šta ga gledan.


kad san jučer namistila taj 4. kanal na način da san nanovo uvezla kanale, na ovi moderni tv me tokalo za svaki program jopet namištat ime da znan koji mi je od serija od zločina, a na koji moš čut je li ko napa jameriku. i još me tokalo za svaki minjat zvučne postavke da mi ne krči ka lud, vengo da mi se čuje normalno. 

poza svih tih kanala i namištanja me zabolila ćiverica. propisno. i naši su još u taj nesritnji vaterpolo izgubili. onda san okrenila na 2. i tamo me tokalo još vidit kako je i ajduk izgubija.

a mogla san lipo jemat starinski tv, pa me ne bi zabolila glava jerbo na temu ne bi ništa namištala i ne bi ništa gledala. mogla san opče ne imat tv, pa ne bi ništa ni čula ni vidila.
često čovik tako reče šta je ovo meni tribalo, a?

jednom san tako bila blesava, pa san kupila i gps za tonobil. ono ka, tribat će mi jednom već, pa neka ga. 

znate li koliko san ga puti duperala do sad, a? jedan jedini i to da vidin je li to čudo radi. uštekala ga, uputila se put šibenika i on mi nacrta da gren na autoput, a ja u šibenik pođen magistralon i dok se to čudo teknike snašlo, počelo mi je govorit skrenite livo. 
je, oču, oli mi pamet smeta, di ću livo, u more, a? 

onda smo mu isključili ton. ja ga više ni pogledala nisan, a peršona ča se ti put vozila sa menom mi je rekla da je sve do šibenika nacrta dobro. 

sta mi je u armerunu godinama i nikidan san ga probala uključit, tako iz đira, ali sad je prazan, triba mu najprvo malo baterije napunit, pa ću to narafski učinit čin se sitin jerbo bez njega stvarno ne moren. a kako su ljudi vozili prije tega, a? kako, a? isto ka i ja danas, po znakovima, e...

dobro, jedan put kad pođen digod di se ne moren snač ti gps će mi sigurno dobro doč. 

vjerojatno ću i usisavač za tonobil duperat još koji put jerbo san ga do sad, a kupila san ga kad san kupila tonobil prije skoro 5 godin, duperala jušto dva puta. 

brže i jednostavnije mi pomogne jedna mala metla i škovacera. a šta ću, to san ja, o' teknike, a s teknikon jeman posla samo kad baš moran i onda se pitan ča mi je tribalo poč kupit to čudo sa milijun botuni, 200 stranica uputa itd. 

oli život nije bija jednostavniji sa normalnim tv, normalnim tonobilom, brez mobitela, pogotovu pametnih itd.?!

e bravo, sad mi je palo napamet da u portapaku jeman i jednu lumbrelu za sunce oli suncobran. otvorila san je do sad dva oli tri puta, nađen ja uvik bokun lada ispod bora oli kojega tamarisa. to mi je jednostavnije , a šta ću :P

gren ča, ono pametno čudo o' mobitela mi grinta i ronje da nisan dovoljno vode popila. triba vazest još koju čašu. jemate pozdrav, zdravi i veseli bili i neka vas teknika sluša. 

Nema komentara:

Šufit