e... uvođenje reda je na redu. u ciloj državi, ali vrime je da i svak od nas u svojoj kući, uredu i životu uvede red. jerbo, ne možemo kukat da je sve gnjilo i da ništa ne valja, a da kroza to vrime ni ono ča smo sami mogli i to brez puno pinezi nismo uredili, e... koliko van se puti dogodilo da kopate po škafetinu i na kraju ga ciloga izvučete iz stola i istresete sve vanka u potrazi za nečin ča van triba, a? jutros mi je poveća grijota bila bacit dvi škatuulice o' kraš keksi (za puno kurjože s kakaon :)) jerbo se o' dvi škatulice o' kartuna može baš svašta učinit. evo, ja san okinila nožicama na dva različita načina da dobijen bočna pokriva i lipo ih oblipila malo čvršćon karton (to možete i od škartoca iskidat, a možete uzest i koji ukrasni papir, kako van drago) i okitila ih sa malo uzorka sa jedne darovne karte (za svrhu ukrašavanja možete duperat i kolaž papir, možete sami nešto nacrtat oli napisat, zalipit gotovu etiketu itd. mogućnosti su bezbrojne).
a šta jeman u tim škatulicama, a? lipilo oli kolu, rezervni selojtep i rezervni nosač za selojtep, dvi malešne rezervne klamarice i punjenje za klamarice. veći i jači nosač za selojtep i veća klamarica stoje na stolu jerbo mi to triba svaki čas.
u drugu san stavila i to u dvi škatulice malešne štipalice, veće puntinice oli uredske brokvice - (kako se ovo zapravo zove, a?), krpice za čistit laptop, ispod su i četkice za njega te sredstvo za čišćenje (to se na sliji ne vidi, ali znan da ste puno kurjoži ča je ispod krpe, pa pišen, e...)
za malo reda brez škatula koje imaju pokriva evo van jedna ideja s interneta, ovod je sve složeno u kutijice koji mi pare da su o' late, a morete uzest i štagod plastično oli recimo one o' đelata ča se prodaje po frižiderima velikih butigi. ovih ću se sitit za neki drugi škafetin. osin u uredu, ovo se može duperat i za kužinu, šupu, wc i sl.
ekola, gren ča, zdravi, veseli i uredni bili :)
inače na toj fejs stranici jema jako puno ideji, povirite:
Nema komentara:
Objavi komentar