led na vjetrobanu moga twinga - klik za veće
e... novi snig nije pada. bogu fala. izašlo je i sunce. po ulicama leda koliko očeš. hod triba bit vrlo pažljiv. solinska je očišćena za vozit i mislin da bi pomalo moga vozit oni ča jema zimske gume. vidila san i bus 37, to je oni ča gre za kaštila i trogir. još je dosta zima, ali pomalo kalmaje. u konzumovu butigu na solinskoj je danas bilo svih vrsti kruva i mesa, ali verdure ni za lik. dobro je da išta jema na ovakvo vrime. aj, nećemo krepat o' gladi, ali da su grad i županija zakazali u ovakvin vremenskim NEprilikama, jesu. probala san malo očistit tonobil. ono, da se sve to skupa lakše raskrabi. slikala san vjetroban kad san bokune leda skinila, a bokuni su ostali, da vidite debljinu LEDENE SANTE (a kako ovo nazvat, haha?!). poza dva dana vidila san mačka kojemu svaki dan nosin izist u dvoru. ajme ča je bija gladan. ja san mu doduše svaki dan ostavljala spizu, ali on se bija sakrija na sigurno i nije izlazija iz skloništa, a spiza se ledila. danas se pošteno nabuba. ni danas ne radimo i to ne ča ja ne bi radila, vengo ne želin da se neko polomi na putu do nas oli odlazeći od nas. narafski, to ne znači da ne komuniciran sa svima. evo jučer mi je baš bilo smišno, trefila san mater o' jednega moga učenika koji je skulu odavno finija i već radi. navukla žena stare bičve priko postoli i iako je led i smrzlina oče ona i popričat, javit se. probija se do mene po ledu. kad vidiš takve ljude, ništa višje nije teško. kad me toka radit dok svi drugi odmaraju, uvik se sitin i tih dobrih trenutaka, dobrih ljudi; zaradi takvih se stvarno isplati trudit.
ekola, gren pomalo ča, ožeži sunce, rasrabi ovu monadu o' sniga, dosta nam je bilo :)
narafski, grad je pu škovaca (bilo bi čudo da je drugovačije) i postavljan pitanje: kad će se praznit kontejneri?
narafski, grad je pu škovaca (bilo bi čudo da je drugovačije) i postavljan pitanje: kad će se praznit kontejneri?
Nema komentara:
Objavi komentar