petak, 31. prosinca 2010.

stara je godina ka i stara kuća




stara kuća by xvii

e... silvestrovo. stara godina. zadnji dan dvi iljade i desete. digod mi se pari da je stara godina ka i stara kuća. škriplju joj škure, promaja vlada, cvile grede. svi bi je tili šta prije potaracat, učinit novu i neka bude bolje. narafski, doč će nova godina, švere nikad ne fermaju, ali baš sve ne moš potaracat. ostaju uspomene na grubo i lipo. nekoga oli nešto smo u ovoj godini i volili, nečem smo se i nasmijali, neko je bija i dobar prema nama. dogodilo se i gruboga, znan, ali na grubo je najbolje ča manje mislit. parti 2010., dobro se provedite svitu moj, lipo dočekajte 2011., stavit ćemo novi kalendar i gremo dalje. životu jemamo još šta dat.

ponedjeljak, 27. prosinca 2010.

a šta nam je došlo do šapica, a? :)


špiro sa darovima by xvii

Pet shop Gold (oni ča je na Mažuranićevo, fala mu) nas je izdariva za Božić.Dobili smo malo Friskies i Darling propagandnog materijala. Miša na navijanje, duplu terinu i žlicu koja je zapravo pirun za vadit spizu iz važa te žabu ljuljalicu. Ola ča smo sritni i ponosni, ko nam je ravan :)

nedjelja, 26. prosinca 2010.

još nekoliko blagdanskih sličica

kuglice

kuglice na mom dlanu

isprid katedrale

isprid katedrale

jubav
jubav

lampice
lampice

kuglica
kuglica

riva
riva

zvončić
zvončić

marmontova
detalj iz marmontove

detalj
detalj split

šiška
šiška

anđeli i grančice
anđeli i grančice
klik za veće, sve by xvii

straše nas da će snig, ali...


e... ovo je jedan bokunić stariji litrat. snig 73. - Split, moja mater i ja. vidi se da guštan za poludit. moja jubav prema snigu je počela od malih nogu. narafski da san i danas najsritnija ka počne padat snig, to su mi najdraži dani u godini. jedva ga čekan u splitu.
[viruje li mi iko, a?]

subota, 25. prosinca 2010.

e... duperat će se dvi vrsti balance

e... en ti bakalare, tice, pršute, sireve, kolače... bit će već sutra kalavanje kila. gledanje u balancu. poza tega i jopet gledanje u balancu jerbo ono ča samo ugledali nije moguće. a ne, ne, ma ke, sigurno se pokvarila, oli išta moderno može durat, a? sve su to ionako kineske škovace po po šolda, papi-lova ča izvuče čoviku pineze iz takujina, a onda brzo reče pa-pa, ne radin višje, a servisa sigurno jema puno, punooo ka gljiva poza kiše. poza tega ćemo se još jedanput popet na balancu, ali sad drugu, onu ča jema šveru jerbo ta će sigurno pokazat drugovačije, te su bile bolje i kvalitetnije napravljene. je, ši, kako da ne, šipak. kakve san sriće, ta će pokazat i još višje. onda ćemo malo trkat po merjanu, hodat brzo gori doli, pa i jopet trkat, činit fiskulturu, čučni digni se. narafski, poza tega i jopet na balancu. uajme, milosti nima, mrš na ti merjan i prikosutra, ko nam je kriv ča smo prasačkoga štumika, ka gudini, ka samo baš sve i svašta tribali utrpat u sebe, e... kroz par dana, more bit da će bit i koji dek manje. kil sigurno neće jerbo brzo se natuku, a sporo bižidu ča. ka političari su, oni isto tako brzo kredu, a sporo završe u pržunu, mrski su nam i niko nije sritan ka ih trefi. i tako, kad negdi oko tridesetoga budemo zadovoljni ča smo se barenko donekle doveli u red, doč na na red silvestrovo, doletit će i jopet tice, ali ovi put prasice i jopet ćemo ka prajci udrit po spizi. a onda ćemo i jopet duperat višje vrsti balanci i mukotrpono skidat ono ča smo lako natukli. e i sad ča mi sve to triba, a? oli mi nije bolje kad izin jogurt za večeru, a? je, ali baklar je bakalar, a svist je svist. triba dikod i prikrdašit da bi poslin moga grintat, kukat i po merjanu trkat. :)

čarolija svemira

e... mislin da su uza libre teleskop i mikroskop ludilo darovi. možeš vidit cilu lipotu svita, velikoga, dalekoga i maloga, bliskoga... dica više vole tice jurilice i pupe barbike, šteta. možda im niko nije reka za libre, teleskop i mikroskop. provajte jedne godine i s njima :)
pogledajte slije koje daje jutarnji, fenomenalno nešto.

petak, 24. prosinca 2010.

čestitka


svima koji viruju želin sritan božić, a svima, baš svima, puno jubavi, mira, nade i dobre volje!

e... oču da mi vonje bakalar






e... badnjak je.

anđo, oču da mi vonje bakalar! - vika je roko prč u malo misto...
nima višje borisa dvornika, nima ni zdravke krstulović, ali žive oni kroza uloge koje su odigrali.
nima višje ni moga dide, umra je jema 10 godin, a njegov bakalar na brudet je vonja najbolje. niko ga nije zna učinit ka on.
on se sa svima bija svadija jerbo za sve te organizacije je bija prepametan i prikovišje svoj. iako je bija od katoličke fameje, najprvo se pokara sa crikvom, a poslin je peta roge i partiji, pa ga je za dišpet svima činija na silvestrovo, a ne na badnjak, ali svake ga je godine mora učinit.
tražili smo po kuvaricama njegovon rukon ispisane ricete, ali nažalost mora bit da su se negdi izgubile kroza godine. ako ih ikad nađen, stivat ću ih ovod.
sad ga kuva moja mater, lani je ispa odličan, a nadan se da će bit i ove godine.
ovo je njena riceta, malo je oduzela i malo dodala prima diki radici, dalmatinskoj kuvarici, i učinila nešto svoje. evo san je jušto sad činila da je i izdiktira. š njon ću na internet da se ne bi izgubila ka i ona o' pokojenega mi dide.
gre ovako:

Za 4 peršone potribno je:


- po kila bakalara
- kvarat maslinovoga uja
- 1 veća kapula
- kil kumplira
- konšerva
- luk
- petrsimul

Bakalar se pomoči dan oli dva prije vengo ča ćemo ga poč učinit. minjajte vodu da se ne usmrdi. Poza tega ga ogulite i izvadite drače. Učinite ga na male bokune.

Za po kila bakalara potribno je kvarat maslinovoga uja na kojemu se zažuti 1 veća lisnato izrizana kapula. Kad je kapula žuta, dodajte baklar pripremljen na bokuniće.

Kad se malo isprži sa svih strana, maknite ga s vatre. Dodajte kumplire izrizane na fete, složite ih redom.
Nalit vode toliko da je sve pokriveno i dodat:

- 1 žlicu konšerve te
- bokuniće isickanoga luka i petrsimula,
- soli po želji.


Puštite ga tako da par puti naglo prokuva, a poza tega smanjite vatru i neka kuva još uru i po do dvi. Ne mišajte, vengo protresite teču.
Nemojte ga izisit ravno s kuvala, počekajte barenko po ure.

Večeras ćemo drugi dil bakalara ča ga je darova sindikat učinit i na bilo (ricetu za to ćemo dat dogodine, ne more sve odma, jema dana), a riceta za fritule je već godinama dostupna ovod:

http://web.vip.hr/nmagazin.vip/ricete11.html - to je moja riceta i jušto tako ispadnu odlične.

Guštajte!
za google: bakalar, fritule, bakalar na brudet, bakalar na brujet

a evo kako je ispa... još malo pa ćemo ga guštat.



četvrtak, 23. prosinca 2010.

darovi


darovi by xvii
e...
u bokun lipe karte san zamotala darove.
ni u jednome nisu dragulji ni dijamanti,
ali su svi dobri.
a šta je dobroga tot, a?
e, činin kuco jerbo to mora bit iznenađenje :)

srijeda, 22. prosinca 2010.

kakva je bila 2010.?


špiro i cukrić by xvii
e...


ove godine je još malo, božić i još koji dan i 2010. bit će stara. dočekali smo je sa puno nade i vire, ali razočarala je. fala bogu na izmaku je, još malo pa će finit. šta reč? zapravo, počela je dobro, a onda su se naredale krize, katastrofe i sve moguće nevolje.
hrvatska je nakon pustih godin dobila jednega normalnoga, obrazovanoga i kulturnoga čovika za predsjednika. barenko nešto, kad je već sve drugo loše i imberlano. kroza ovu godinu dan predsjednik josipović me nije razočara. nije arčija pineze, litova je u svojoj kući, nije odija po 'otelima kad je doša u split, vengo je spava kod soldati ka vrhovni zapovjednik. narafski, nije mu opče lako u opanak zemlji koja na sva zvona veliča nepismenost, urla doli libri i čitanje, izruguje i maltretira sve obrazovano. posidija je bidan otkad je predsjednik.

premijerka kosor je pak dijametralno suprotnog ponašanja. ona stalno priča o nekoj štednji, šparanju, ma na sebi mižeriju ne sprovodi, ma ke, e... kupuje broševe, a sa sinom i cilom svitom je i godine ove litovala u pet zvizdica. godinu je svakako obilježilo i hapšenje njenog dragog prijatelja ive, ali i ostalih njenih dragih prijatelja. odakle se znaju, a? e pa to je hdz, zna se. kako ih je svak normalan štuf, fermajen o njima.

narafski, poteštat kerum nam je jema isto puno veselja za pričinit. on dili šakom i kapom nezaposlenima i penžjunatima. da se odma razumimo, onima ča nimaju i triba pomoć, ali u toj skupini jema i puno onih ča jemaju penzije ohoho, a i nezaposlenih koji neće da rade. narafski, kerum ne dili svoje pineze, vengo pineze poreznih obveznika ove zemlje, a kako sam i ja ta, jeman pravo reč ča mislin. e bravo, kad se već spominje porez, meni je ove godine u manje od 6 miseci grad split puka 4000 kuna poreza na tvrtku, 2x2000 kn. to su najveći mogući iznosi, a moje poduzeće je malo, malešno. onima ča jemaju milijunske dobiti od prodaje ćevapa je određeno 300 kn. o bože, učini nešto da hrvatska ne bude više opanak zemlja. narafski, da je unatoč temu ča nam je naplatija toliko poreza, kerum pustija da grad bude pun govana, šporkice i škovaca. evo, virovali oli ne, ove škovace http://www.xvii-online.org/2010/09/festa-od-nereda-sporkice-i-skovaca.html su još na svome mistu, niko ih pokupija nije. dogradonačelnici, gospođi anđi visković san apropo tega pisala nikoliko puti, ali gospođa anđa jema prišnijih briga od grada splita. kerumove hareme i bigamiju nećem komentirat, oli nije split dosta osramotija, ne želin još i ja ovod na kraju godine puno pisat o njegovome kurvarluku i nemoralu.

cilu godinu nam prite da ćemo bit gladni i svit se pripa. ono ča je prije trošija, sad stišće u takujinu. promet je svima pa, svi lančano jemaju manje pinezi i manje se troši na sve. lagala bi kad bi išla reč da san ove godine baš lipo zaradila. teško mi je ka svakome poštenome čoviku. zapravo, nikad gore otkad radin. dosta je stvari na skonto sad će reč neko, ali svit je prezadužen, ostaju ljudi bez posla, novi se ne zapošljavaju, cijena benzina je dosegla svoj vrhunac. fala bogu da ne vozin prikovišje, a i inače u životu živin tiho, mirno i skromno.

privatno, ovu ću godinu pamtit i po temu da san se u njoj oprostila od mojih malih kumpanji, maca muće i pahuljice. uvik ću ih volit. u ovoj godini su u moj dom došli cukrić (ž) i špiro (m) i nekako mi pari da je to najbolje ča mi se dogodilo ove godine. meni to, a svima nama, pa i meni i normalan predsjednik republike hrvatske. drugo je sve bilo ili loše ili more stat ili tako tako. nadan se da slidi bolja godina. barenko bokunić. i to u svakome pogledu.
ovih par dana ča je ostalo ću mislit na koji dobar bokunić spize, učinit ću mrvu veselja, odmorit, spavat, šetat, čitat, opustit se... ne triba se prikovišje sekirat, doč će i nova godina, ne moremo vrime fermat.

nedjelja, 19. prosinca 2010.

ajmo ča gledat crtić :)

dosta vam je loših vijesti? štufi ste lupeštine i svakodnevnih problema?
ajmo ča nešto veselo, pa nećemo valjda uvik samo kukat :)))


život

moja je tuga ptica slomljenih krila.
moja se sreća u kaplji rose skriva.
pustite me da izdržim bol,
to je moja bol.
pustite me da živim sreću,
to je moja sreća.
by xvii

subota, 18. prosinca 2010.

ulični ukrasi

ulični ukrasi

ulični ukrasi by xvii

špiro

špiro by xvii
e...
višje vridi pogled (a i brk, uši, šape itd.) ovega mačića, vengo cila zemaljska balota.
dobiti, profiti, zarade, dividende itd. su skroz besmisleni.
sve skupa, na cilome svitu, ne bi bile dosta za vazest špira.
jerbo, špiro je jubav, a jubav nima cijene.

petak, 17. prosinca 2010.

negdi na kraju splita

klik za veće
e... danas me je tokalo na kraj splita. kako nisan divojka sa sela, vengo iz centra parilo mi je ka da gren na kraj svita. nisan njanci znala kako bi vozila tamo jerbo san tražila nešto, pa san išla na noge. kad san našla ča san tribala, produžila san na noge i u city centar one. drugi put ćemo tonobilon, jema dana. sad mi je lako kad znan di je. zapravo od početka vukovarske kod općine vozite drito. na higijenski nećete fermat jerbo tribate još vozit. kraj doma za starije nećete fermat, vengo vozite dalje. kraj fesba isto nećete fermat, vengo i još vozite još. samo drito. doč ćete na kraju tamo negdi kod lovrinca i vidit ćete, piše velikin slovima. tako ćete nač. a šta kupit, a? jema svega i ja virujen da ću još koji put tu doč, jema majci, teknike, postola, spize. je, ši, jema svega, ali ovi put nisan kupila ništa. bila san preumorna da išta izaberen, pa san jednostavno malo šetala, gledala izloge i slikala neke ukrase. je, to na balunu san ja :)

srijeda, 15. prosinca 2010.

za dušu

summit mafije, kažin i no coffe tot

e...
ka ča znate ja uvik rađe hodan, vengo vozin tonobil. i tako ja nikidan na merjan na noge. malo trčanja, malo hodanja, dobro je sve to skupa za zdravje, a neka se malo ušpara i benzine; ionako je došla po zlato.
kako mi je ti dan obid bija bokunić kasnije, tako se i to sprovođenje mojih fizičkih aktivnosti dogodilo bokunić kasnije jerbo san bokunić kasnije izašla iz kuće a onda i iz portuna vengo ča san navikla.
narafski, sunce nije išlo leč bokunić kasnije i meni se dogodilo da je pomalo počeja padat mrak ka san bila negdi povišje kašuna. nije to još bija tutokompleto mrak, ono, mrkla mrčina, ali pomalo je stiza sumrak.
ja na noge i gledan o' isprid sebe kad jeman šta i vidit.
cilo mnoštvo crnih tonobila sa zamračenin caklima gre put bena, ovo za nesplićane oče reč u kontra smjeru tj. put merjana.
sve nike bisne zviri o' tica jurilica. audi, bmw i još svašta nešto ča vidin da su zviri, ali njanci ne znan kako se zove. jurišaju ka da su na trke. di je ograničenje oko 30 kilometri na uru, raspalili su barenko 60.
velika priša.
svitu moj, parilo mi je ka da idu na summit mafije, ono cosa nostra oli tako nešto. jemali su st registracije, pa ne virujen da je talijanska mafija, prije će bit rvacka i ova iz prijateljskih susidnih država, a to su narafski bih i srbija. mafiji je u rvackoj lipo, ne boji se ona tot nikoga, oli im ko šta može, a?! sad će neko reč da kako ja znan da je to bila mafija, a? jednostavno, ko bi pametan moga popit da su ti tonobili kupljeni od poštenoga rada, a? ili su o' lupešćine ili su ukradeni, nima druge.
osin sumita mafije, na merjanu i to naročito kod bena, morete vidit po tleju ostatke keksualnih aktivnosti u ogromnim količinama, a prije nije bilo tako. sad pari ka da je kažin tot. kažin, kupleraj, bordel, kako god očete.
ljudi koji svaki dan hrane maške na merjanu mi govore da su nikidan likovi ćelavih, razbijačkih glava tot pustili bisne pase da prikolju bidne maške, a u zadnje vrime su kako čujen tot i puste maške otrovane.
a znate li ko jema upravljanje nad benama, a? ne znate? željko kerum, čovik koji je nažalost spliski poteštat oli gradonačelnik.
e i otkad on to drži, ja tot kavu (oli kako bi na staron spliskom reka moj pokojni dida kafu) višje ne pijen. zašto, a? a zato ča mi društvo neće bit ni talijanska ni balkanska cosa nostra ni kurbetine, a i ne želin da se o' mojih pinezi puni takujin liku ka ča je željko kerum. nismo par, nije to moj kumpanjo ni idol, me ke, e...

utorak, 14. prosinca 2010.

jedva čekan ka ću skočit u more

e, je da mi ovod fale kašuni u splitu i slanica na murteru,
ali idemooooo na kupanje...
tamo nema zime :)))


špiro i cukrić, san, pogled, igra



san by xvii





pogled by xvii








igra by xvii

film nije najbolje kvalitete jer je snimljen u kantunu di nema dovoljno svitla,
ali su zato glumci najbolji :))))

dida mraz

portret - dida mraz

dida mraz by xvii

e... morete mislit koliko je bilo moje razočaranje kad san jednom makla pokrivo o' fumara i kad su izletila sva ona pisma koja san ka dite napisala dida mrazu. da smanjin razočaranost, brzo san sebe uvjerila da je dida mraz ipak sve to pročita jerbo san darove uvik dobila, ali da nije jema mista za arhiviranje dokumentacije jerbo je sjeverni pol malešan, pa da je korisnicima usluge vratija pisma u fumare, a želje uredno ispunija. nije tija itat pisma svugdi okolo jerbo je ekološki osvišten i nije tija zagađivat okoliš.
nemojte dici razbijat iluzije i čarolije, neka viruju u ove smišne i šesne stvari jerbo u temu i je čudo djetinjstva.
vengo, pustih dida mrazova ovih dana moremo trefit. šetaju po butigama, na tv su, na internet, na kartolinama, još malo i poč će u vižite po dičjin vrtićima, izlozi su ih puni.
a koji je pravi, a?
e to je ključno pitanje. nikad ne znaš. evo ja san jučer peškala jednega mobitelom u splitu na rivi. zašto ne, a? možda je baš taj pravi :)

ponedjeljak, 13. prosinca 2010.

sveta luce


sv. luce

sv. luce by xvii - klik za veće

e... sveta je luce. samo na jedanput godišnje, na današnji dan, otvara se kripta o' ispod katedrale sv. duje. ljudi uzimaju vodu za prat joči, pale šterike, mole za vid. sije se i pšenica, da naredna godina bude dobra. stari splićani su jemali užancu darivanja dice na sv. lucu, nadan se da su dičica danas dobila lipe darove. svim lucama, lucijama i lucijanima čestitan imendan.

Šufit